Bıyl Almatynyń ındýstrıaldyq aımaǵynda 6 ónerkásip parki ashylady
Qazirgi ýaqytta qurylysshylar jobalyq jumystardy aıaqtap, ýchaskelerdegi qurylys-montaj jumysyna kirisýdi josparlap otyr. Óndiristik úı-jaıdyń jalpy aýdany - 28 myń sharshy metr. Onda qurylys, jıhaz, jeńil jáne tamaq ónerkásibi salasynda 70-ke jýyq óndiris ornalasady. 700-den astam jańa jumys ornyn ashý josparlanǵan.
Óndiristik úı-jaılar shaǵyn jáne orta bıznes sýbektilerine jeńildikti sharttarmen: devalvatsııalyq táýekelderge qaramastan 5-7 jyl merzimge bekitilgen jaldaý mólsherlemesi boıynsha beriledi. Jalǵa alý quny 1 sharshy metrge - 1000-1200 teńge. Satyp alý quny – 1 sharshy metri 145 myń teńgege deıin.
«Almaty qalasynyń ındýstrıaldyq aımaǵyndaǵy shaǵyn ónerkásip parkine qatysýǵa 56 kompanııa qyzyǵýshylyq tanytyp otyr. Ónerkásiptik park jobalaryn iske asyrýdyń artyqshylyqtary kóp. Máselen, qalada bos turǵan óndiristik jáne ákimshilik úı-jaı aınalymǵa engiziledi, iskerlik belsendiligi tómen aýdandarda bıznes ashýǵa jáne damytýǵa kómek kórsetiledi, 2-7% mólsherinde qarjylandyrýdyń jeńildikti mólsherlemeleri bar» delingen habarlamada.
Qazirgi tańda Almaty qalasynyń Naýryzbaı aýdanynda eki ónerkásip parki («BrotMaster» JShS jáne «Ala Estate» JShS) jáne Túrksib aýdanynda bir ónerkásip parki («Samruk Group» JShS) jumys isteıdi. Onda jıhaz, galantereıa, sýsyndar, kofe qýyrý óndirisi bar. Birqatar áleýetti qatysýshylarmen kelissóz júrip jatyr.
Almaty ındýstrıaldyq aımaǵy 2012 jyly qurylǵan. Jalpy aýmaǵy - 490 ga. Onyń ishinde jobalar úshin 326 ga bólindi. 58 kompanııa rezıdent, onyń ishinde 18 kompanııada sheteldikterdiń úlesi bar. Olar 260 mlrd teńge ınvestıtsııa salyp, 8,5 myń jumys orny ashylady.
12 kásiporyn paıdalanýǵa berilgen. Jalpy ınvestıtsııa somasy - 68,8 mlrd teńge. 1864 jumys orny ashylyp, 1,9 mlrd teńge salyq tólendi. 62,3 ga aýmaq ıgerildi.
2020 jyly qurylys belsendi júrgizilip jatqan 10 jobany iske qosý josparlanyp otyr. Investıtsııanyń jalpy somasy - 30,5 mlrd teńge. 1 140 jumys orny ashylady. 2021 jáne odan keıingi jyldary 159,5 mlrd teńgege 36 jobany iske qosý josparda bar. Onda 5 450 jumys orny bolady.
