Bıyl Almatynyń avtobýs parki 100 paıyz jańarady
NUR-SULTAN. QazAqparat - Almatyda qalalyq kólik reformasynyń aralyq qorytyndysy shyǵaryldy, dep habarlaıdy QazAqparat tilshisi.
«Úsh jyldyń ishinde ishinde 1 113 jańa avtobýs satyp alynyp, elimizdegi alǵashqy BRT jelisi iske qosyldy, karsherıng pen velesıpedti jalǵa berý qyzmeti engizildi. Metronyń jańa eki stansasynyń qurylysy men LRT jeńil relsti tramvaı jobasyn júzege asyrý jalǵasyp jatyr», dep jazdy Almaty ákimi Baýyrjan Baıbek Instagram paraqshasynda.
Ákimniń atap ótýinshe, búgingi kúni Almatynyń avtobýs parki 80 paıyzǵa jańarǵan. Bul kóleńkeli aınalymdaǵy qarajatty shyǵarýǵa múmkindik bergen «Ońaı» qolma-qol aqshasyz tólem júıesin engizýdiń arqasynda júzege asyrylyp otyr. Qazirgi ýaqytta barlyq tranzaktsııalardyń 97 paıyzy qolma-qol aqshasyz júzege asyrylady. Qala turǵyndary arasynda QR-kod arqyly tólem jasaý múmkinshiligi de tanymal bolyp kele jatyr.
Buǵan qosa, jolaqysynan túsetin kiristiń aıqyn bolýy tasymaldaýshylardyń aldynda parkit jańartý jáne qyzmet kórsetý sapasyn arttyrý máselesin kóterýge múmkindik berdi.
Kólik holdınginiń málimetterine qaraǵanda, eger jeke tasymaldaýshy «BATÝ TRAVEL» kompanııasynyń ótken jylǵy sáýirdegi túsimi sýbsıdııalar men ótemaqylardy qospaǵanda 4,7 mln teńge bolsa, al bıylǵy sáýirde bul tsıfr 12,3 mln teńgege jetip otyr. Dál osyndaı jaıt «Dýman Trans» jeke tasymaldaýshysynda da bolǵan. Atalǵan kompanııa ótken jylmen salystyrǵanda túsimin 1,8 esege arttyrýǵa qol jetkizdi.
«Bıyl Almatynyń avtobýs parki 100 paıyz jańartylatyn bolady. Taıaý ýaqytta shamamen taǵy 500 avtobýs, onyń ishinde gazben júretin 200 jáne 60 tirkemeli avtobýs jetkiziledi. Qalalyqtardyń maǵan Instagram arqyly júginýlerin eskere otyryp 38 baǵdardy jańartýǵa tapsyrma berdim. Ol jaqqa gazben júretin jańa 18-metrlik avtobýstar qatynaıdy. Kópshilik pikirlerinde 48 baǵdardy aýystyrýdy ótinip jatyr. Jańartamyz», - dedi Baýyrjan Baıbek.
Avtory: Danııar Dáýitalıev
