Bıyl Almatydaǵy qısaıǵan 17 kópqabatty úıdiń irgetasy nyǵaıtylady
ALMATY. QazAqparat - Bıyl «Zerdeli» shaǵynaýdanynda qısaıyp ketken 17 kópqabatty úıdi qaıta qalpyna keltirý kózdelgen, dep habarlaıdy QazAqparat tilshisi.
«QazQSǴZI» AQ baspasóz qyzmetiniń málimetinshe, «Zerdeli-6» shaǵynaýdanynda qısaıyp ketken kópqabatty úılerdi zertteý jumystary 2020 jyldyń qarasha aıynda aıaqtalady.
«Biz barlyq qujatty ákimdikke tapsyrdyq. Qashan jáne qaı úıdiń irgetasyn nyǵaıtý kerektigin ákimdik sheshedi. Biz óz jumysymyzdy tehnıkalyq jaǵynan oryndadyq. Al nyǵaıtý, qalpyna keltirý, aıaqtaý jumystary týraly suraqqa ákimdik jaýap beredi» dep túsindirdi «QazQSǴZI» AQ baspasóz qyzmeti.
Óz kezeginde ákimdik byltyr «Zerdeli» shaǵynaýdanynda qısaıǵan 7 úıdiń qalpyna keltirilgenin habarlady. Bıyl taǵy 17 kópqabatty úıdiń irgetasy nyǵaıtylatynyn atap ótti.
Buǵan deıin «Zerdeli» shaǵynaýdanynda ornalasqan barlyq kópqabatty 32 turǵyn úıge tekserý júrgizý úshin 312 mıllıon teńge baǵyttalǵanyn jazǵan bolatynbyz.
Eske salaıyq, 2019 jyly Alataý aýdanyndaǵy «Zerdeli» shaǵyn aýdanynyń turǵyndary úıleriniń qısaıǵanyn aıtyp, dabyl qaqqan bolatyn.
Keıin Baqytjan Saǵyntaev qısaıǵan úıdiń turǵyndarymen kezdesip, ákimdik olardy kóshirýge daıyn ekenin jetkizdi.
