Bıyl Almatydaǵy qısaıǵan 10 kópqabatty úıdiń irgetasy nyǵaıtylady
ALMATY. QazAqparat - «Zerdeli» shaǵynaýdanynda qısaıyp ketken 17 kópqabatty úıdi qaıta qalpyna keltirý qolǵa alyndy. Onyń 10-y bıyl, qalǵan jeteýi 2022 jyly nyǵaıtylady, dep habarlaıdy QazAqparat tilshisi.
«Búgingi kúni irgetasy nyǵaıtylmaǵan 17 kópqabatty úı qaldy. Merdiger kompanııamen kelisimshart jasaldy, bıyl biz 10 úıdi, kelesi jyly qalǵan 7 úıdi qaıta qalpyna keltiremiz», - dedi Almaty qalasy Alataý aýdanynyń ákimi Azamat Qaldybekov qalanyń qoǵamdyq keńesiniń otyrysynda.
Aıta keteıik, «Qazaq qurylys jáne sáýlet ǵylymı-zertteý jáne jobalaý ınstıtýty» AQ «Zerdeli-6» shaǵynaýdanynda qısaıyp ketken kópqabatty úılerdi zertteý jumysyn 2020 jyldyń qarasha aıynda aıaqtaǵan.
Óz kezeginde ákimdik byltyr «Zerdeli» shaǵynaýdanynda qısaıǵan 7 úıdiń qalpyna keltirilgenin habarlady. Atalmysh shaǵynaýdanda ornalasqan barlyq kópqabatty 32 turǵyn úıge tekserý júrgizý úshin 312 mıllıon teńge baǵyttalǵan.
Eske salaıyq, 2019 jyly Alataý aýdanyndaǵy «Zerdeli» shaǵyn aýdanynyń turǵyndary úıleriniń qısaıǵanyn aıtyp, dabyl qaqqan bolatyn. Keıin qala ákimi Baqytjan Saǵyntaev qısaıǵan úıdiń turǵyndarymen kezdesip, ákimdik olardy kóshirýge daıyn ekenin jetkizdi.
