Bıyl Almatyda turǵyn úı kezeginde turǵandardyń 20 paıyzy baspanamen qamtamasyz etildi - B. Baıbek
ALMATY. QazAqparat - Bıyl Almatyda turǵyn úı kezeginde turǵan, áleýmettik osal toptarǵa jatatyn turǵyndardyń 20 paıyzy baspanamen qamtamasyz etildi.
Buǵan «Nurly jol» memlekettik baǵdarlamasynyń arqasynda qol jetkizilip otyr. Búgin Almaty qalasynyń Alataý aýdanynda ornalasqan «Aqkent» turǵyn úı kesheninde turǵyn úı kezeginde turǵan azamattarǵa páter kiltin tabystaý rásimi barysynda qala ákimi Baýyrjan Baıbek osylaı dedi.
Onyń aıtýynsha, buǵan deıin qalada turǵyn úı kezeginde turǵan azamattardy baspanamen qamtamasyz etý jylyna 10 paıyzǵa oryndalyp kelgen.
«Elbasy Nursultan Nazarbaevtyń salıqaly saıasatynyń arqasynda elimizde beıbitshilik, turaqtylyq, qoǵamdyq kelisim saltanat quryp jatyr. Halyqtyń áleýmettik jaǵdaıy birtindep jaqsaryp keledi. Mine, búgin turǵyn úı kezeginde turǵan azamattarymyzǵa páter kiltan tabys etip jatyrmyz. Qazirgi tańda Almatyda 15 myńnan astam azamat turǵyn úı kezeginde tur. Eger sońǵy jyldary olardy pátermen qamtamasyz etý tek 10 paıyzǵa oryndalyp kelse, bıyl «Nurly jol» baǵdarlamasynyń arqasynda ol eki esege ósip, 20 paıyzǵa oryndalyp otyr», - dedi B. Baıbek.
Osydan keıin qala basshysy saltanatty jaǵdaıda «Báıterek» «UBH» AQ basqarma tóraǵasy Qýandyq Bıshimbaevpen birge birneshe turǵynǵa páter kiltin tabystady. Keıin jańa turǵyn úıdiń ekinshi qabatyna kóterilip, turǵyndardyń biriniń eki bólmeli páterin aralap kórdi. Júzi qýanyshqa toly páter ıesi qonaqtardyń ústinen shashý shashty.
Osydan keıin Baýyrjan Baıbek Almaty qalasynyń memlekettik turǵyn úı qorynan jańa páterlerge qol jetkizgen Uly Otan soǵysynyń ardagerlerin quttyqtap, olarǵa páter kiltin tabystaý úshin osy aýdannyń «Alǵabas» yqshamaýdanyna attandy.
Naqtylaı ketelik, búgin «Aqkent» turǵyn úı kesheninde «Báıterek» Ulttyq Basqarý Holdıngi» AQ-nyń enshiles kompanııasy bolyp tabylatyn «Qazaqstan Ipoteka Kompanııasy» Ipotekalyq uıymy» AQ satyp alǵan jańa 275 páterdiń 50-i turǵyndarǵa berildi. Al qalǵan 225 páterdiń kilti turǵyndarǵa osy aıdyń sońyna deıin tabystalady.
Páterler 1-2-3 bólmeli bolyp keledi. Jalpy aýdany 19 195 sharshy metrdi quraıdy. Al aılyq jaldyq tólem 1120 teńgeden aspaıdy.
