Bıyl Almatyda sport sektsııalary men úıirmelerge 3,2 mlrd teńge bólindi

ALMATY. QazAqparat- Almatyda bıyl sport sektsııalary men úıirmelerdi qarjylandyrýǵa 3,2 mlrd teńge bólindi. Bul týraly brıfıng barysynda qalalyq sport basqarmasynyń basshysy Rústem Baıseıtov aıtty, dep habarlaıdy QazAqparat tilshisi.

Spıkerdiń sózinshe, Almatynyń jergilikti atqarýshy organdarynyń aldyna balalardy buqaralyq sport túrlerine belsendi tartý, sondaı-aq tegin sport sektsııalary men úıirmelerin ashý mindeti qoıylǵan.

Sonymen qatar, ol el Prezıdenti Qasym-Jomart Toqaevtyń 2021 jylǵy 1 mamyrdan bastap memlekettik tapsyrys aıasynda sport sektsııalary men shyǵarmashylyq úıirmelerdi jan basyna normatıvtik qarjylandyrý tetigi engizilgenin eske saldy.

Baǵdarlama 4 jastan 17 jasqa deıingi balalar men jasóspirimderge, onyń ishinde erekshe qajettiligi bar balalarǵa 71 sport túrinen sport sektsııalaryna tegin qatysýǵa múmkindik beredi.

Rústem Baıseıtovtyń aıtýynsha, ótken jyly atalǵan jobany júzege asyrýǵa bıýdjetten 1,2 mlrd teńge bólindi, 44 myń bala men jasóspirim sektsııalar men úıirmelerge tegin qatysty.

Eń kóp suranysqa ıe sektsııalar fýtbol, shahmat, taekvondo, dzıýdo, júzý boldy.

«Bıyl osy maqsatqa 3,2 mlrd teńge baǵyttaldy. Endi balalar sportpen jáne shyǵarmashylyqpen aınalysa alady. Bul ata-analar úshin tamasha múmkindik, olar bólimdi tóleýge aqsha jumsamaıdy. Bizdiń málimetterimiz boıynsha, bir balaǵa sport sektsııasyna barýdyń ortasha quny aıyna 20 500 teńgeni quraıdy», - dedi qalalyq Sport basqarmasynyń basshysy.

Balalar úıirmeleri men sport sektsııalaryn jan basyna qarjylandyrýdy iske qosý protsesin avtomattandyrý maqsatynda artsport.edu.kz aqparattyq júıesi ázirlendi.

Búginde vedomstvonyń málimetinshe, jetkizýshilerden 594 ótinim maquldandy.

Memlekettik sporttyq tapsyrysty jan basyna normatıvtik qarjylandyrý aıasynda jattyǵýǵa sporttyń 37 túri boıynsha 44 bala kiristi.

Rústem Baıseıtov almatylyqtardy osy múmkindikti paıdalanyp, balalardy sektsııaǵa berýge shaqyrdy.