Bıyl Almatyda sport kúni tuńǵysh ret «Medeý» sport kesheni men «Shymbulaq» taý-shańǵy shıpajaıynda ótedi
ALMATY. QazAqparat - Bıyl Almatyda sport kúni tuǵysh ret «Medeý» bıik taýly sport kesheni men «Shymbulaq» taý-shańǵy shıpajaıynda ótedi. Bul týraly búgin Almatyda ótken baspasóz máslıhatynda «Medeý» bıik taýly sport kesheniniń resmı ókili Áıgerim Berlibaeva málimdedi.
Onyń aıtýynsha, «Medeý» sport kesheninde jyl saıyn tamyz aıynyń úshinshi jeksenbisi kúni ótetin sporttyq sharany ortasha taý deńgeıinde ótkizý ıdeıasyn Almaty qalasynyń ákimdigi, «Shymbulaq» taý-shańǵy shıpajaıy jáne basqa da seriktes kompanııalar qyzý qoldaǵan.
«Bul mereke dástúrli túrde velojarystan bastalady. Qatysýshylar tańǵy saǵat 08:00-de «Býtakovka» shatqalyna jınalady. Jarys saǵat 08:30 bastalady. Máre syzyǵy «Medeý» sport kesheniniń aldy. Jeńimpazdarǵa baǵaly syılyqtar tabys etiledi. Al sport kesheniniń ózinde kelýshiler arasynda fýtboldan, basketboldan, voleıboldan, strıtboldan jarystar ótedi. Sonymen qatar, velosıpedter men skeıtbordtardy jalǵa alýǵa bolady», - dedi óz sózinde Áıgerim Berlibaeva.
Bul jerde bir aıta ketetin jáıt, sport keshenine kirý tegin bolǵanymen, sporttyq alańdar, sporttyq kerek-jaraqtar arzan baǵaǵa jalǵa beriledi. Velojarysqa 2000-ǵa jýyq, al bul kúni atalmysh sport keshenine 5000-ǵa jýyq adam keledi dep kútilýde.
Atalmysh sporttyq shara qala turǵyndary arasynda salamatty ómir saltyn nasıhattaýǵa baǵyttalǵan.
