Bıyl Almatyda qansha mektep pen balabaqsha salynady

ALMATY. QazAqparat - Almaty qalasy jaıly qalalyq orta basqarmasynyń basshysy Sapar Nurashev onlaın brıfıng barysynda 2020 jyly atqarylǵan jumystar men bıylǵy jyldyń josparymen bólisti, dep habarlaıdy QazAqparat tilshisi.

Onyń aıtýynsha, jańa orta jáne mektepke deıingi bilim berý uıymdaryn iske qosý boıynsha bekitilgen baǵdarlamalar men tapsyrmalar sheńberinde 2020 jyly 18 nysannyń qurylysy aıaqtalǵan.

«Onyń 10-y jańa qurylys, onda 3 817 oqýshy jáne 240 mektepke deıingi oryn quryldy. 8 nysan boıynsha qoldanystaǵy ǵımarattardy qaıta qurý jáne seısmıkalyq kúsheıtý boıynsha jumystar oryndaldy. Budan basqa, tapshylyqty azaıtý maqsatynda osy jyly 41 bilim berý obektisiniń qurylysy júrgizilýde, bul bıyldyń ózinde 20 myńnan astam jańa oqýshy jáne mektepke deıingi oryndardy qurýǵa múmkindik beredi»,-dedi basqarma basshysy.

Qazir júrgizilip jatqan qurylys ishinde 12 600 oqýshyǵa arnalǵan 8 jańa mektep jáne 8 263 oqýshyǵa arnalǵan 17 qosymsha qurylys, 2 jańa balabaqsha qurylysy jáne 14 nysandy keńeıtýmen qaıta qalpyna keltirý nysandary bar. Bul mekemelerdiń qurylysyna qarjy bólindi.

«Áleýmettik ınfraqurylym qurylysy sheńberinde, bekitilgen «Jańa Almaty» keshendi josparyna sáıkes bıyl Alataý jáne Naýryzbaı aýdandarynda ınnovatsııalyq shyǵarmashylyqtyń 2 ortalyǵyn (oqýshylar úıi) salý kózdelgen. Búgingi tańda jobalyq-smetalyq qujat ázirlenýde»,-dedi ol.