Bıyl Almatyda 89 kósheniń joly jóndelmek
ALMATY. QazAqparat - Almatyda bıyl kóshelerdi jóndeýge 9 mlrd teńge jumsalmaq. Bul týraly Óńirlik kommýnıkatsııalar qyzmeti alańynda qalalyq Jolaýshylar kóligi jáne avtomobıl joldary basqarmasynyń basshysy Maqsut Isahov málimdedi, dep habarlaıdy QazAqparat tilshisi.
«Bıyl Almatyda kóshelerdi ortasha jóndeýden ótkizýge 9 mlrd teńge qarastyrylǵan. Jalpy alǵanda uzyndyǵy 150 shaqyrym bolatyn 89 kóshege ortasha jóndeý jasaý josparda tur», - dedi Maqsut Isahov.
Onyń aıtýynsha, byltyr uzyndyǵy 147 shaqyrym bolatyn 171 kóshede ortasha jóndeý jumystary júrgizilgen.
Atap aıtqanda, 2017 jyly Abaı kóshesin «Qalqaman» shaǵyn aýdanyndaǵy Áýezov kóshesinen qala shekarasyna deıin uzartý boıynsha jumystar aıaqtalyp, 2 ýchaske paıdalanýǵa berilgen.
«Bókeıhanov - Soltústik aınalma kósheleri qıylysyndaǵy kólik jolaıryǵy» jobasy iske qosyldy. Alataý aýdanynda - 10,9 shaqyrym, Naýryzbaı aýdanynda 17,335 shaqyrym jol salyndy. 6 kópir men Baıtursynov kóshesi kúrdeli jóndeýden ótkizildi, sondaı-aq Jandosov kóshesin kúrdeli jóndeýden ótkizý jumystary jalǵasýda. Qalada 230 000 sharshy metr asfalt-beton jabyndysy jóndeldi», - dedi ol.
Sondaı-aq, ol qalanyń kóliktik ınfraqurylymyn damytýǵa baǵyttalǵan 2023 jylǵa deıingi is-sharalar kesheninen turatyn jol qozǵalysyn uıymdastyrýdyń keshendi syzbasy (JQUKS) ázirlengenin jetkizdi.
