Bıyl Almatyda 86 ınvestıtsııalyq joba júzege asyrylmaq
Investorlar eń kóp qarajatty jyljymaıtyn múlikke, kólik, ónerkásip jáne qarjy-saqtandyrý qyzmetine salady. Investıtsııa kólemi boıynsha Almaty Atyraý oblysynan keıin ekinshi orynda tur. Bul týraly onlaın brıfıng barysynda Almaty qalasy Kásipkerlik jáne ınvestıtsııalar basqarmasynyń basshysy Erkebulan Orazalın málim etti.
Onyń aıtýynsha, karantınniń shekteý sharalaryna qaramastan, 1-toqsannyń qorytyndysy boıynsha ınvestıtsııa kólemi 34,5% ósimmen 191 mlrd teńgege jetti.
Investıtsııalar úsh kiris kózinen tartyldy, olardyń negizgi úlesi kásiporyndardyń menshik ıelerine tıesili – 68,8%, al bul 131,5 mlrd teńge, qaryz qarajaty - 17,4% - 33,1 mlrd teńge jáne memlekettik bıýdjet-13,8% (26,4 mlrd teńge).
«Ivestorlar 5 salaǵa eń kóp senim artyp, qarjy quıady. Atap aıtar bolsam, jyljymaıtyn múlik – 82,9 mlrd teńge, kólik jáne qoımada saqtaý – 25,6 mlrd teńge, ónerkásip – 15,1 mlrd teńge, qarjylaı jáne saqtandyrý qyzmeti – 14,7 mlrd teńge jáne aqparat jáne baılanys – 8,1 mlrd teńge», - deıdi ol.
Erkebulan Orazalın 2021 jylǵa arnalǵan josparlar týraly aıtty. Aldaǵy ýaqytta 9,5 myń adamdy jumyspen qamtýǵa qaýqarly 362,1 mlrd teńge somasyna 86 ınvestıtsııalyq joba júzege asyrylady.
«Almatyda «Demeý qory» AQ 18 mlrd.teńge somasyna balet teatrynyń qurylysy bastalady.10 mlrd teńge jumsalyp, Jetisy kópfýnktsıonaldy qonaq úı kesheni salynady jáne «Almaly» saýda ortalyǵy 7 mlrd teńgege qaıta jańǵyrtylady», - dep atap ótti Erkebulan Orazalın.
Almatyǵa ınvestıtsııa salý tıimdi, óıtkeni qalada bızneske qolaıly jaǵdaılar jasalǵan. Qala ekonomıkasyna qarjy quıatyn kásipkerlerge memlekettik organdar tarapynan qoldaý kórsetiledi.
