Bıyl Almatyda 600 aýla jańarady
ALMATY. QazAqparat - Almaty ákimi Baýyrjan Baıbek jumys sapary barysynda eski úılerdi buzý baǵdarlamasyn júzege asyrý, aýlalardy abattandyrý jáne qalanyń birqatar dańǵyldaryn jańartý barysymen tanysty, dep habarlaıdy QazAqparat tilshisi.
Súleımenov kóshesiniń qılysy men Jandosov kóshesinen joǵary 50 jyldary salynǵan úılerdi buzý jumystary bastalady. 8 páterli úıdiń ornyna «Almaty ÁKK UK» AQ jeke qurylys júrgizýshimen birge ortalyqtandyrylǵan kommýnıkatsııa júıesi bar kópqabatty turǵyn úı salýdy josparlaǵan. Jalpy osy aımaqta 44 eski úı buzylady. Sonymen qatar, Jetisý aýdany Raıymbek dańǵyly boıyndaǵy 2,7 ga jerge ornalasqan eki qabatty apatty úıler alynady. Jalpy, taıaý jyldary 500 eski jáne apatty úıler buzylyp, olardyń ornyna 1,2 mln. sharshy metr turǵyn úı salynady.
«Bul baǵdarlamany júzege asyrý birqatar máseleni sheshýge jol ashady. Qalanyń kelbeti ózgeredi, jumys oryndary ashylady, ınvestıtsııa tartylady, eń bastysy, qalalyqtardyń turmystary jaqsarady», - dedi Baýyrjan Baıbek.
Jumys sapary kezinde qala ákimi Áýezov aýdanyndaǵy jańarǵan aýlalardy kórdi. Bıylǵy jyly 65 aýla jóndeledi. Eger ótken jyly qalada 500 aýla jóndelse, bıyl taǵy da 600 aýla jańarady. Jańa aýlalar salý josparynda balalar jáne sport alańdary bar. Qosymsha trenajer jáne oıyn keshenderi paıda bolady. Olardyń edenderine asfalt jáne rezına tóseledi. Oryndyqtar men qoqysqa arnalǵan jáshikter qoıylady, jaryq kózderi ornatylady. Keıbir aýlalarǵa pılotty rejımde kún sáýlesimen jumys isteıtin jaryq baǵanalary ornatylǵan. Keıin olar ózge aýlalardy jóndegen kezde keńinen paıdalanylady dedi.
Sondaı aq, Almaty ákimi qalanyń tarıhı ortalyǵyn jańartýǵa qatysty júrip jatqan qurylys jumystarynyń qarqynymen tanysty.
Aıta keteıik, Qazirgi kezde Abaı, Abylaı han, Nazarbaev dańǵyldary men Abaı alańynda ınjenerlik jelilerdi qaıta júrgizý, tas tóseý, jaryq baǵanalaryn, sýarý júıelerin aýystyrý, kire berister men nysannyń syrtqy kelbetin ózgertý jumystary júrip jatyr. Rekonstrýktsııa aıasynda jaıaý júrginshi aımaǵy keńeıedi, kóleńkeli keńistikke jasyl jelek otyrǵyzylady, fontandar jańarady jáne salynady.
