Bıyl Almatyda 35 shaqyrymdyq aryq júıesi qalpyna keltiriledi - qala ákimdigi
ALMATY. 5 tamyz. QazAqparat /Názıra Eleýhan/ - Bıylǵy jyly Almatyda 35 shaqyrymdyq aryq júıesi jáne saıabaqtar men gúlzarlardy sýarý júıesi qalpyna keltiriletin bolady.
Bul týraly búgin Almatyda qaladaǵy sý nysandaryna júrgizilgen reıd barysynda Almaty qalasynyń Tabıǵı resýrstar men tabıǵatty paıdalanýdy retteý basqarmasy bastyǵynyń orynbasary Eldar Keldibaev aıtty.
«Aryq jasaý men sýarý jumystary ajyramas keshendi júıe, sondyqtan bizdiń jumystarymyz osy eki baǵyt boıynsha júrgizilýde. Qazir asfalttar tóselinip ketken aryqtar qaıta qylpyna keltirilýde, tesý ádisi boıynsha qubyrlar qoıylýda. Bunymen qatar, jol shetinde dúńgirshek qoıylǵan avtobýs aıaldamalary joıylatyn bolady, onyń ornyna standartty eýropalyq úlgidegi aıaldamalar 2014 jylǵa deıin qoıylyp bitetin bolady»,-dedi E. Keldibaev.
Onyń aıtýynsha, qazirgi tańda qalada, Úlken Almaty ózeni arnasyn tazalaý men kógaldandyrý boıynsha iri kólemdi jumystar júrgizilýde. «Munda qazirgi ýaqytta sýǵa túsý alańdary, demalý oryndary salynýda jáne Jetisý aýdanyndaǵy qaraǵaıly saıabaqta kógaldandyrý jumystary jasalynýda. Bunymen qatar, Abaı dańǵylyndaǵy Bas aryq (Ortalyq neke saraıynan Seıfýllın kóshesine deıin) qalpyna keltirilýde»,-dedi maman.
Onyń aıtýynsha, qazir Almaty úshin úlken másele - aýyzsýdy qalanyń kólik jýý oryndarynyń qoldanyp otyrǵandyǵy bolyp tur. «Ákimdik kólik jýý ıelerine tazartý júıelerin qoıyp, sol sýdy qaıta qoldanýdy talap etip otyrsa da, kópshiligi ony oryndamaýda. Biz aıyppul salyp, ákimshilik jaza qoldansaq ta nátıje bolmaı otyr. Óıtkeni, Ákimshilik kodeks boıynsha, aıyppul kólemi az, sondyqtan olarǵa tazartý júıesin qoıǵansha, aıyp tólegen tıimdi. Bunymen qatar, biz kishi jáne orta bıznes nysandaryn jylyna bir ret qana tekserýge quqylymyz. Aınalyp kelgende, sheshimi joq sheńber»,-deıdi E. Keldibaev.
