Bıyl Almatyda 10 sport nysany salynady
ALMATY. QazAqparat - Qala ákimi Baqytjan Saǵyntaevtyń halyqqa esep berý kezdesýinde Medeý aýdanynyń turǵyny sport ınfraqurylymyn damytý máselesin qozǵaǵan bolatyn, dep habarlaıdy QazAqparat tilshisi.
«Biz qazir keshendi baǵdarlama jasadyq, ıaǵnı bul – sport keshenderin salý. Bıyldyń ózinde bıýdjettiń esebinen alty sport kesheni salynady. Budan bólek jeke kásipkerler de keshen soǵyp jatyr. Ekinshiden, ashyq alańdar jasalynýda. Biz osy ashyq alańda balalardy sportpen shuǵyldandyrý úshin tájirıbeli jattyqtyrýshylardy shaqyryp jatyrmyz»,- dedi Baqytjan Saǵyntaev.
Jalpy bıyl 10 sport nysanynyń qurylysy josparlanýda, onyń altaýy jergilikti bıýdjet esebinen.
Bul 5 dene shynyqtyrý-saýyqtyrý kesheniniń qurylysy, onyń ishinde qala shetinde Jetisý aýdanynyń «Aınabulaq - 2» shaǵyn aýdanynda, Medeý aýdanynyń «Alataý» shaǵyn aýdanynda, Túrksib aýdanyndaǵy «Jas Qanat», Jetisý aýdanyndaǵy «Kemel» jáne «Qulager» shaǵyn aýdandarynda.
Sondaı-aq, Alataý aýdanynda jabyq jáne ashyq korttary bar tennıs ortalyǵynyń qurylysy josparlanǵan.
Qurylys jumystary bastaldy, aıaqtalý merzimi - 2021 jyl.
Sonymen qatar, bıyl orta mektepterdiń 52 stadıonyn jańartý josparda.
Balalardy tegin sport sektsııalarymen qamtýdy arttyrý úshin mektep sporty federatsııasymen birlesip qala mektepterinde sport klýbtaryn ashý jumystary júrgizilýde.
«Suńqar» halyqaralyq shańǵy tramplıni kesheniniń 2-shi kezeginiń qurylys-montajdaý jumystary júrgizilýde, «Jańa Almaty» baǵdarlamasyna sáıkes sport sektsııalaryn keńeıtý jumystary júrgizilýde, onyń basymdyqtary Naýryzbaı, Alataý, Túrksib jáne Jetisý aýdandarynyń turǵyndary úshin sport qoljetimdi bolmaq»,- dedi ákim.
Aıta keteıik, bıyl qala balalaryn sportpen, mádenıetpen jáne mektepten tys qosymsha bilim berýmen qamtý úshin 2020-2021 jyldarǵa arnalǵan jol kartasy ázirlendi.
Ol Almaty qalasynyń bilim, sport, mádenıet, qoǵamdyq damý, qoǵamdyq densaýlyq saqtaý basqarmalarynyń birlesken sharalar qabyldaýyn kózdeıdi.
