Bıyl Almatyda 1 291 bıznes joba sýbsıdııalandy

ALMATY. QazAqparat - Almatyda «Damý» qory 2021 jyldyń 9 aıynda 1 291 bıznes-jobany sýbsıdııalady. Bul týraly baspasóz máslıhaty barysynda «Damý» kásipkerlikti damytý qory AQ Almaty qalasy boıynsha óńirlik fılıalynyń dırektory Svetlana Nazarıýk málim etti, dep habarlady QazAqparat tilshisi.

Svetlana Nazarıýktiń aıtýynsha, pandemııa qor qyzmetterin tsıfrlandyrý protsesin jedeldetti.

«Shaǵyn jáne orta bıznes úshin memlekettik qoldaý barynsha qoljetimdi. Barlyq bıznes-protses tsıfrlandyrylyp, avtomattandyrylǵan. Qazirgi ýaqytta bıznes-protsesterdiń 94%-y avtomattandyrylǵan. «Damý» e-Gov portalynda qarjylyq qyzmetterdi usynatyn alǵashqy kvazımemlekettik kompanııa», - deıdi spıker.

2019 jyly qor óziniń Online-Damu platformasyn iske qosty. Barlyq ótinimder onlaın rejımde qabyldanady. Sýbsıdııalaý sharttaryna elektrondyq tásilmen de qol qoıýǵa bolady. Mundaı tsıfrlandyrý klıentter úshin yńǵaıly bolyp qana qoımaı, protsesterdiń ashyqtyǵyna kepildik berýge múmkindik beredi.

Spıkerdiń sózinshe, 2021 jyldyń 9 aıynda jalpy nesıe somasy 130,04 mlrd teńge boldy. 1 291 joba boıynsha sýbsıdııalaý shartyna qol qoıyldy jáne 15,3 mlrd teńge sýbsıdııa tólendi. Bul ótken jylmen salystyrǵanda toǵyz ese kóp.

«Almaty qalasy nesıelendirý somasy boıynsha óńirler arasynda kóshbasshy. Onyń ishinde nesıeler/mıkrokredıtter boıynsha syıaqy mólsherlemesiniń bir bóligin portfeldik sýbsıdııalaý sheńberinde 4,17 mlrd teńge nesıe somasyna 806 jobaǵa, al ekinshi baǵyt sheńberinde 125,87 mlrd teńge somasyna 485 jańa jobaǵa qoldaý kórsetildi», - dedi Svetlana Nazarıýk.

«Damý» qory fılıalynyń dırektory pandemııa kezinde zardap shekken ShOB sýbektilerine sýbsıdııa berý aıasynda Almatyda birinshi tolqyn aıasynda 1,5 mlrd teńge somasyna 825 shartqa; ekinshi tolqyn aıasynda – 570 mln teńge somasyna 273 shartqa; úshinshi tolqyn boıynsha – 428 mln teńge somasyna 337 shartqa qol qoıylǵanyn aıtty. Barlyǵy 2,5 mlrd teńgege 1 435 kelisimshart jasaldy.

Prezıdent Qasym-Jomart Toqaevtyń tapsyrmalaryn oryndaı otyryp, «Damý» qory 2021 jyldyń 9 aıynda jalpy nesıe somasy 24 386 mln teńgege 879 kepildik berdi, kepildik somasy 11 082 mln teńge. Qarjylandyrylǵan jobalardyń qurylymynda óńdeý ónerkásibi, kólik jáne qoımalaý, sondaı-aq qyzmet kórsetý salalary basym. «Qarapaıym zattar ekonomıkasy» baǵdarlamasy (basym jobalardy kredıtteý tetigi) aıasynda aǵymdaǵy jyly Almatyda 20 mlrd teńgeden astam somaǵa 20 joba qoldaý aldy, olardyń ishinde óńdeý ónerkásibi salasyndaǵy kásiporyndar basym.