Bıyl Almaty oblysyndaǵy jalǵyz monoqalaǵa kógildir otyn tartylady
TALDYQORǴAN.QazAqparat - Almaty oblysyndaǵy jalǵyz monoqala - Tekelige bıyl kógildir otyn tartylady. Qazirgi tańda Taldyqorǵan qalasynan joǵary qysymdy gaz qubyryn tartý jumystary bastaldy. Bul týraly qala ákimi Baqtııar Ónerbaev turǵyndar aldyndaǵy esebinde málimdedi, dep habarlaıdy QazAqparat tilshisi.
Sondaı-aq, shahardyń ınvestıtsııalyq jáne týrıstik múmkindikteri tanystyryldy. Qala mańynan ınvestorlarǵa týrıstik nysandar salýǵa 3 gektarǵa jýyq jer qarastyrylǵan. Eseptik kezeńde Úkimet deńgeıinde kóterilgen Tekeliniń ekologııalyq máselesi de sheshimin tapty. Taý-ken baıytý kombınatynyń eski qaldyq tógetin qoımasyn jaýyp tastaý úshin respýblıkadan qarjy bólindi. Sonymen qatar kenshiler qalasynyń ákimi «Nurly jer» baǵdarlamasynyń aıasynda «Dostyq» shaǵyn aýdanynda 80 páterli jaldamaly úıdiń qurylysy aıaqtalǵanyn málim etti. Endi kezekte turǵan adamdarǵa páter kiltterin aqpan aıynda tapsyrý josparlanyp otyr.
«Oblystyq bıýdjetten 1,2 mlrd teńge qarajat bólinip, Taldyqorǵan-Tekeli jolynda magıstraldi qubyr júrgizilýde. Bul jumys 2018 jyldyń birinshi jartyjyldyǵynda aıaqtalady. Qazir jeke kásipkerlermen jumys istep jatyrmyz. Tekeliniń ishki gaz tasymaldaıtyn qubyrlaryn salý, jobalaý máselesimen aınalysýdamyz. Jalpy, 2017 jyly Kenshiler qalasyna 5,4 mlrd ınvestıtsııa tartyldy. Onyń 76 % bıýdjetten tys qarjy», - dedi Tekeli qalasynyń ákimi Baqtııar Ónerbaev.
