Bıyl Almaty oblysynda jol apatynan 260 adam kóz jumdy
TALDYQORǴAN. QazAqparat - Bıyl Almaty oblysynda jol apatynan 260 adam kóz jumdy, dep habarlaıdy QazAqparat tilshisi.
Almaty oblysynyń tártip saqshylary jol-kólik oqıǵalarynyń basym bóligi belgilengen jyldamdyq rejımin saqtamaý saldarynan oryn alyp jatqanyn aıtty. Tek osy sebepti jyl basynan beri 500-den astam apat bolǵan.
«Jalpy, Almaty oblysy boıynsha jyl basynan beri 1743 jol-kólik oqıǵasy bolyp, 260 adam kóz jumdy. Onyń 503-i belgilengen jyldamdyq rejımin saqtamaý saldarynan boldy, onda 102 adam qaza taýyp, 848 adam jaraqat aldy. Eger ákimshilik jazalar boıynsha tsıfrlardy alatyn bolsaq, jyl basynan beri oblys aýmaǵynda jyldamdyq rejımin asyrǵany úshin 16 307 ákimshilik hattama jasaldy», - dedi Almaty oblysy PD JPQB bastyǵynyń orynbasary, polıtsııa maıory Meıir Demeýbaev.
Osyǵan baılanysty Respýblıkalyq mańyzy bar avtojoldarǵa «KRIS-P» avtomobıl radarlary men fotoradarlyq keshenderi qoıylady.
«Tek bir táýlik ishinde joǵaryda atalǵan tehnıkalyq quraldardyń kómegimen jyldamdyq rejıminiń eki júzden astam buzylýy anyqtaldy. Sondaı-aq, júrgizýshilerden qysqy kezeńniń jaqyndaýyna jáne aýa raıynyń nasharlaýyna baılanysty, qaýipsizdik maqsatynda jazǵy shınalardy qysqy shınalarǵa ýaqtyly aýystyrýlaryńyzdy suraımyz. Jol qozǵalysy erejelerin saqtańyz, óıtkeni bul bárimizdiń qaýipsizdigimiz!» - dep tolyqtyrdy polıtsııa maıory Meıir Demeýbaev.
