Bıyl Almaty oblysynda MJÁ negizinde 11 jobany júzege asyrý josparlanýda
TALDYQORǴAN. QazAqparat - Bıyl Almaty oblysynda memlekettik-jekeshelik áriptestik negizinde 11 jobany júzege asyrý josparlanýda. Jalpy quny 20 mlrd. teńgeni quraıdy, dep habarlaıdy QazAqparat tilshisi.
Búgin bul jóninde Almaty oblysynyń ákimdiginde ótken jıynda málim boldy. Semınar barysynda oblys ákiminiń mindetin atqarýshy Lazzat Turlashov Memleket basshysynyń tapsyrmasyn oryndaý maqsatynda oblysta MJÁ damytý baǵytynda aýqymdy jumystar atqarylyp jatqanyn atap ótti. Máselen, bıylǵy jyly 20 mlrd. teńgege 11 jobany júzege asyrý josparlanyp otyr. 2018 jyly quny 36,6 mlrd. teńge bolatyn 47 joba qolǵa alynady. Atap aıtqanda, 37 balabaqsha, turmystyq qatty qaldyqtardy jınaqtaıtyn 9 polıgon, 1 mýzeı.
«Memleket basshysy «Qazaqstannyń úshinshi jańǵyrýy: jahandyq básekege qabilettilik» atty Joldaýynda MJÁ memleket pen bıznestiń basty jalpyulttyq mindetterdi qalaı birlesip sheshetininiń aıǵaǵy retinde atap kórsetken edi. Sondyqtan biz bul baǵytta nátıjeli jumys isteýge tyrysýdamyz. Ol úshin ınvestor tartý jumysy belsendi júrgizilýde. Jalpy 2020 jylǵa deıin Almaty oblysynda memlekettik-jekeshelik áriptestik negizinde quny 56,6 mlrd. teńge bolatyn 66 jobany júzege asyrý kózdelip otyr», - dedi L. Turlashov.
Semınarǵa Almaty oblysy men Almaty qalasy ákimdikteriniń ókilderi, Ulttyq ekonomıka mınıstrliginiń Bıýdjettik ınvestıtsııa jáne MJÁ damytý departamentiniń dırektory qatysty.
«Biz Almaty oblysyn memlekettik-jekeshelik áriptestik sheńberindegi jobalardy júzege asyrýda kóshbasshylardyń biri dep esepteımiz», - dep atap ótti «Qazaqstandyq memlekettik jekeshelik áriptestik ortalyǵy» AQ tóraǵasynyń orynbasary Ǵalymbek Mamraev Taldyqorǵan qalasynda QR Ulttyq ekonomıka mınıstrligimen birlesip ótkizgen kóshpeli semınar kezinde sóılegen sózinde.
Basqosý barysynda kásipkerler men jergilikti atqarýshy organdardyń aldynan shyqqan alǵashqy kezderdegi problemalyq máseleler talqylandy. Sonymen qatar semınardy uıymdastyrýshylar qoıylǵan saýaldarǵa tolyqqandy jaýap berdi.
