Bıyl Almaty oblysynda múgedekterdi ońaltýǵa bólingen qarjy 3 mlrd. teńgege jýyqtady
TALDYQORǴAN. QazAqparat - Almaty oblysy ákiminiń orynbasary Jaqsylyq Omardyń tóraǵalyǵymen múgedekter jónindegi oblystyq úılestirý keńesiniń kezekti otyrysy ótti. Jıynda negizgi baıandama jasaǵan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Zaıda Іlimjanova múgedekterdiń quqyqtary týraly Konventsııanyń oryndalý barysy týraly aıtty, dep habarlaıdy QazAqparat tilshisi.
Baıandamashynyń aıtýynsha, oblysta 61,1 myń múmkindigi shekteýli azamat bolsa, sonyń 53% nemese 32,4 myń adam 1-2 toptaǵy múgedekter, 7,1 myń adam nemese 11,7% - múgedek balalar. 2016 jylmen salystyrǵanda múgedekterdi ońaltýǵa bólingen qarjy 2017 jyly eki esege jýyq kólemde ósip, 2, 8 mlrd. mlrd. teńgege jýyqtady.
Sonymen qatar 2012 - 2014 jyldary múgedekterge kedergisiz orta qalyptastyrý maqsatynda 2117 áleýmettik ınfraqurylym nysandaryna pasporttaý sharasy júrgizilgen. Sonyń 400-iniń birinshi kezekte beıimdeýge jatatyny anyqtalyp, bul sharalarǵa oblystyq bıýdjetten 266,0 mln.teńge bólingen bolatyn. Onyń ishindegi 40 nysan bıylǵy jyly beıimdeletin bolady. 2017 jyldyń 1 maýsymyna barlyǵy 375 nysanda beıimdeý sharalary aıaqtaldy. Z. Іlimjanova sonymen qatar múgedekterdi jumyspen qamtý, sýrdoaýdarma qyzmetine degen qajettilik deńgeıi, múgedekterden kelip túsetin aryz-shaǵymdar týraly da birqatar máseleler kóterdi.
«Kedergisiz orta qalyptastyrý úshin nysandardy beıimdeý, ınklıýzıvti bilim berý sapasyn únemi baqylaýda ustaýymyz kerek. Inklıýzıvti bilim berýge qatysty mektep pen balabaqshalar boıynsha Jol kartasyn ázirleńizder. Múgedekterdi qoldaý, ońaltý jáne olarǵa járdem berýdiń basqa da sharalaryna bıylǵy jyly 3 mlrd. teńgege jýyq qarjy bóldik. Osy qarajattyń ıgerilýin, atqarylǵan jumystyń sapasyn osy úılestirý keńesiniń árbir múshesi qadaǵalaýyna alýy tıis. Múgedekterden kelip túsken aryz-ótinishter qalaı sheshimin taýyp jatyr, keıbir aryzdar nege qaıtalanyp túsedi, sonyń bárine analız jasańyzdar. Múgedekterdi jumyspen qamtýdyń qolymyzda naqty jospary bolýy kerek. Bul iske bıznes-qaýymdastyqty da kóbirek tartýymyz qajet», - dedi jıyndy qorytyndylaǵan oblys ákiminiń orynbasary Jaqsylyq Omar.
