Bıyl Almaty oblysynda 500 gektarǵa jýyq jer otqa orandy
TALDYQORǴAN. QazAqparat - Almaty oblysynyń ákimi Amandyq Batalovtyń tóraǵalyǵymen orman, dala órtteriniń aldyn alý týraly jıyn ótti, dep habarlaıdy QazAqparat óńir basshysynyń baspasóz qyzmetine silteme jasap.
Osy taqyrypqa baılanysty oblystyq tótenshe jaǵdaılar departamentiniń bastyǵy, azamattyq qorǵanys polkovnıgi Daryn Baısarıev baıandama jasady.
Baıandamashynyń sózine súıensek, oblys aýmaǵynda 5 mln gektardan astam jerdi memlekettik orman qory alyp jatyr. Onyń ishinde 1,9 mln gektarǵa jýyǵy ormandy alqapty quraıdy.
Jyl basynan beri 497,7 ga jer aýmaǵynda 158 qurǵaq shóp janýy tirkelgen. Sonymen qatar memlekettik mekemelerdiń aýmaǵynda 2 orman órti oryn alǵan.
Memlekettik órtke qarsy bólimsheleri joq jerlerde 4749 jergilikti turǵyndy tarta otyryp, 361 erikti órt sóndirý jasaqtary qurylǵan. Olar barlyq qajetti tehnıkamen qamtamasyz etildi. Sonymen qatar orman jáne dala órtterin joıý máselelerin shuǵyl sheshý maqsatynda departamenttiń árbir bólimshesinde 39 shuǵyl mobıldik toptar belgilengen. Garnızondyq jattyǵýlar turaqty túrde ótkizilip, órt sóndirý mashyqtary jetildirilýde.
Daryn Baısarıev aýdan, qala ákimdikterin erikti órt sóndirý jasaqtary posttarynyń materıaldyq bazasyn nyǵaıtý, sýǵa túsý maýsymynyń bastalýyna baılanysty oqys oqıǵalardy aldyn alý sharalaryna belsene qatysýǵa shaqyrdy.
Ekinshi bolyp minbege kóterilgen Tabıǵı resýrstar jáne tabıǵatty paıdalanýdy retteý basqarmasynyń basshysy Kerimbek Janshabaı mekemeniń orman órtine daıyndyǵynyń jaıyn habarlady.
K. Janshabaıdyń aıtýynsha, memlekettik orman sharýashylyǵy mekemeleriniń materıaldyq-tehnıkalyq jabdyqtalýy jaqsartylǵan. Búgingi kúni olarda 22 órt sóndirý avtokóligi, 20 sýtaratqysh, tirkemeli quraldarmen jabdyqtalǵan 22 traktor, 141 patrýldik avtokólik, 139 mototsıklmen qamtamasyz etilgen. Sonymen qatar órke qarsy quraldar da daıyndalǵan. Búgingi kúnge órt qaýipsizdigi erejesin saqtamaǵany úshin 9 azamat ákimshilik jaýapkershilikke tartylyp, orman sharýashylyǵyna kelgen 567,2 myń teńge shyǵyn tolyǵymen óndirildi.
Jıyndy qorytyndylaǵan oblys ákimi A. Batalov aýa raıynyń qatty ysyp turǵan qazirgi shaqta órt qaýipsizdigine, sýda shomylý qaýipsizdigine erekshe nazar aýdarý qajettigin aıtty.
«Aýdan, qala ákimderi, ásirese, órtke qaýipti ýchaskelerdi nazardan tys qaldyrmaýlary kerek. Qajetti tehnıkanyń barlyǵy tıisti normalarǵa saı bolsyn. Sýǵa túsý maýsymynda oqys oqıǵalardy boldyrmaý maqsatynda sýda qutqarý qyzmetiniń daıyndyǵy jiti bolýy tıis. Halyqty órt qaýipsizdiginen, sýdaǵy qaýipsizdik jaıynan turaqty habardar etip otyrý qajet. Tıisti orynbasarlaryma bul isti aýdan, qala ákimderi qalaı atqaryp jatqanyn júıeli túrde qadaǵalap otyrýdy tapsyramyn», - dedi A. Batalov.
