Bıyl Almaty oblysynda 35 mektep paıdalanýǵa beriledi
TALDYQORǴAN. QazAqparat - Jyl sońyna deıin Almaty oblysynda 35 mektep, al onyń 24-i bilim kúni paıdalanýǵa beriledi. Bul týraly búgin oblys ákimi Amandyq Batalov Taldyqorǵanda ótken ustazdardyń tamyz konferentsııasynda málim etti, dep habarlaıdy QazAqparat tilshisi.
Bıyl Almaty oblysynyń bilim berý salasynyń bıýdjeti 153,7 mlrd teńgeni qurady. Onyń ishinde bilim berý nysandarynyń qurylysyna 27 mlrd teńgeden astam qarajat qarastyrylǵan. Óńirde 48 bilim berý nysanynyń qurylysy men qalpyna keltirý jumystary júrgizilýde. Jyl sońyna deıin 44 mekteptiń 35-i paıdalanýǵa beriledi. 
Bilim kúninde 24 jańa mektep óziniń alǵashqy oqýshylaryna esigin ashpaq. Osy mektepterdiń 23-i úsh aýysymda oqytý máselesin sheshetin bolady. Al 2018 jyly taǵy 10 mektep salý arqyly úsh aýysymda oqytý máselesi tolyqtaı sheshilmek. Sonymen qatar, bıylǵy jyly 24 mektepte kúrdeli jóndeý jumystary júrgizildi.
