Bıyl Almaty oblysynda 1 mln sharshy metr turǵyn úı paıdalanýǵa beriledi

TALDYQORǴAN. QazAqparat - Almaty oblysynda «Nurly jer» baǵdarlamasyn júzege asyrý jalǵasýda. Bıylǵy jyly josparǵa sáıkes 1 mln sharshy metr turǵyn úı paıdalanýǵa beriledi, dep habarlaıdy QazAqparat tilshisi.

Bul týraly búgin Ortalyq kommýnıkatsııalar qyzmeti alańynda ótken brıfıng kezinde Almaty oblysynyń ákimi Amandyq Batalov aıtty.

Oblys basshysynyń sózine súıensek, «Jumyspen qamtý jol kartasy» sheńberinde óńirge 105 mlrd teńge bólingen. 20 myń jumys ornyn qurǵan 1051 joba júzege asyryldy. Ótken jyly oblys boıynsha 60 myń jumys orny ashyldy.

Baıandamada aıtylǵandaı, «Nurly jer» baǵdarlamasyn júzege asyrý jalǵasýda. Bıylǵy jyly 1 mln sharshy metr turǵyn úı paıdalanýǵa berý josparlanǵan. 2603 páterlik 521 turǵyn úı salynyp jatyr. Sonyń 1212-si kóp balaly otbasylarǵa beriledi. Sonymen qatar jeńildikter qarastyrylǵan «7-20-25», «Baqytty otbasy» jáne «Shańyraq 5-10-20» baǵdarlamalarymen 1986 otbasy páterli bolady.

«Almaty oblysynda qurylys salasynda karantındik shekteýlerge qaramastan jumys qarqyny báseńdegen joq. Sol sııaqty biz shaǵyn jáne orta bıznes nysandarynyń jabylýy saldarynan ornynan bosap qalǵan kóptegen azamatty osy qurylys salasynda jumyspen qamtydyq», - dedi A. Batalov.