Bıyl Almaty oblysy 30 myń tonnadan astam qant óndirmek
TALDYQORǴAN.QazAqparat - Bıyl Almaty oblysynda 9 myń gektarǵa qant qyzylshasy egiledi. Odan 300 myń tonna ónim jınalady dep josparlanýda. Bul byltyrǵydan 60 myń tonnaǵa artyq, dep habarlaıdy QazAqparat tilshisi.
Qazir jetisýlyq sharýalar qyzylsha egýdi jalǵastyrýda. Búgin qant qyzylshasyn ósirýmen aınalysatyn sharýashylyqtar úshin dástúrli «Alqap kúni» semınary ótti. Kóksý aýdanynyń egistik alqabynda bolǵan jıynda sheberlik saǵattary uıymdastyrylyp, paıdaly keńester berildi.
Jalpy bıyl oblys boıynsha 590 sharýashylyq qant qyzylshasyn egedi. Atalǵan jumystar mamyrdyń 10-na deıin aıaqtalady. Al sebilip jatqan tuqymdardyń basym bóligi Frantsııa jáne Germanııadan satyp alynǵan. Bul tuqym túrleri mol ónim beredi. Gektaryna 800 tsentnerge deıin jetedi.
Aıta keteıik, qant qyzylshasyn óńdeý maqsatynda «Aqsý qant» zaýytyn iske qosý jumystary júrgizilip jatyr. Qazirgi tańda oblys boıynsha Kóksý qant zaýyty ǵana jumys istep tur. Byltyr ónimniń kóp bolǵany sonsha, sharýalar zaýyt aldynda uzyn-sonar kezekke turyp, túnegen bolatyn. Bıyl «Aqsý qant» zaýyty jumysyn bastasa Sarqan, Alakól, Aqsý syndy aýdandardyń sharýalary atalǵan mekemege ónimderin ótkizetin bolady.
