Bıyl Almaty ekonomıkasynyń ósimi joǵary qarqynyn saqtady - ákim
ALMATY. QazAqparat - Almaty ákimi Baqytjan Saǵyntaev tikeleı efır barysynda pandemııanyń barlyq qıyndyqtaryna qaramastan, megapolıs óz áleýetin arttyrýdy jalǵastyryp, qalpyna keltirýdiń joǵary qarqynyn kórsetip otyrǵanyn aıtty, dep habarlaıdy QazAqparat tilshisi.
Qala ákiminiń aıtýynsha, bıyl qańtar-qarasha aılarynda qysqa merzimdi ekonomıkalyq ındıkator 108,7%-dy qurady.
Ónerkásipte 20,1%-ǵa, qurylysta – 20%-ǵa, baılanys qyzmetterinde – 13,8%-ǵa, saýdada – 5,1%-ǵa ósý qamtamasyz etildi.
Investıtsııa tartýda joǵary dınamıka baıqalady.
Negizgi kapıtalǵa salynǵan ınvestıtsııa kólemi 17,5% ósimmen 1 014,4 mlrd teńgeni (QR-daǵy úlesi – 9%) qurady.
Sondaı-aq bıýdjet kiristeri ósiminiń joǵary qarqyny qamtamasyz etildi.
2021 jyldyń 11 aıynyń qorytyndysy boıynsha memlekettik bıýdjetke salyqtar men tólemderdiń 28,7% ósimimen.2 trln 558,7 mlrd teńge tústi.
Ekonomıkany qalpyna keltirý memlekettik baǵdarlamalardy belsendi iske asyrý jáne nesıeleýdi keńeıtýmen qatar júrdi.
Atap aıtqanda, qala ákimi atap ótkendeı, Almaty Finance jáne «Almaty MQU» jelisi boıynsha jalpy somasy 513 mln teńgege 9 joba qarjylandyryldy.
«Bıznestiń jol kartasy – 2025» memlekettik baǵdarlamasy aıasynda granttar beriledi, al belsendiligi tómen aýdandarda ShOB yntalandyrý úshin 5%-ben nesıe beriledi.
Jalpy, shaǵyn bıznesti nesıeleý ótken jyldyń osy kezeńimen salystyrǵanda 1,4 ese artyp, 1 trln 835,9 mlrd teńgeni qurady.
Sondaı-aq, ShOB úshin «Qarapaıym zattar ekonomıkasy» jáne «Bıznestiń jol kartasy» baǵdarlamalary jumys isteıdi.
Olar óz tıimdiligin dáleldedi, sondyqtan olardy júzege asyrý kelesi jyly da jalǵasady.
Almatyda jyl basynan beri der kezinde qabyldanǵan sharalardyń arqasynda 55 myńnan astam jumys orny turaqty jumyspen 35 935 adam, ýaqytsha jumyspen – 19 106 adam qamtamasyz etildi) quryldy.
Nátıjesinde jumyssyzdyq búginde 5,1%-dy quraıdy.
Budan basqa, Indýstrıaldy aımaqta 79,7 mlrd teńge somasyna 17 joba iske asyryldy, 154,9 mlrd teńgege ónim óndirildi, 2,6 myńnan astam jumys orny quryldy.
Jyl sońyna deıin Indýstrıaldy aımaqta 519 jumys orny qurylatyn 4 jańa jobany (38,6 mlrd) iske qosý josparlanýda. Olardyń qatarynda sheteldiń qatysýymen PTR-testileriniń óndirisi boıynsha («Kaz-dıa-test» JShS) mańyzdy joba bar.
