Bıyl alǵash ret nesıeniń mólsherlemesi tómendetildi - Asqar Myrzahmetov

  ASTANA. QazAqparat - QR Premer-Mınıstriniń orynbasary - aýyl sharýashylyǵy mınıstri Asqar Myrzahmetov jumys saparymen Jambyl oblysyna baryp, jergilikti taýar óndirýshilerimen kezdesti, dep habarlaıdy QazAqparat tilshisi mınıstrliktiń resmı saıtyna silteme jasap.

Jıyn barysynda otandyq agroónerkásip keshenin damytýdyń 2017 - 2021 jyldarǵa arnalǵan jańa memlekettik baǵdarlamanyń oryndalý barysy men kóktemgi egistik jumystary talqylandy.

«Kóktemniń kesh túsýine qaramastan, egistik jumystary jaqsy qarqynmen júrgizilýde. Aǵymdaǵy jyly alǵash ret kóktemgi-egistik dala jumystaryn júrgizý úshin beriletin nesıeniń paıyzdyq mólsherlemesi tómendetildi. Túpkilikti tutynýshyǵa mólsherleme 6 paıyzdan aspaıdy. Kóktemgi egis jumystary qysqa merzimdi atqarylatyndyqtan, az ýaqytqa nesıe alýshylar sany ósip ketedi. Osy oraıda nesıeni berý jumysyn jyldamdatqan mańyzdy. Sol sebepti bıyl birinshi ret «Agrarlyq nesıe korporatsııasy» tikeleı sharýalardy qarjylandyrýdy bastady. ıAǵnı, ortadaǵy kóptegen satylar qysqartylyp, nesıe barynsha qoljetimdi boldy», - deıdi Myrzahmetov.

Budan ózge, jańa baǵdarlama aıasynda alǵash ret kepilsiz nesıe berilip otyr. Ol úshin taýar óndirýshileri kooperatıvterge birigýi tıis. Al kooperatıvterge birigý arqyly aýyldyń ekonomıkalyq jaǵdaıyn kóterýmen qatar, jumyspen qamtý, turǵyndardyń qalaǵa kóshýi sııaqty áleýmettik máselelerin de sheshýge múmkindik bar.

Asqar Myrzahmetov Almaty, Ońtústik Qazaqstan men Jambyl oblystarynyń basshylaryna máseleniń mańyzdylyǵyn taǵy bir márte eskertip, barlyq maqsat-mindetterdi ýaqytynda oryndaýdy tapsyrdy. Onyń aıtýynsha, jergilikti bılik buqara arasynda túsindirý jumystaryn únemi júrgizip, jumysty durys úılestire bilýleri kerek.