Bıyl áleýmettik tólemder 2 mıllıonnan asa otbasyǵa beriledi – Tamara Dúısenova

ASTANA. QazAqparat – Osy jyly áleýmettik tólemder aıasynda 2 mıllıonnan asa otbasyǵa 1,2 trıllıon teńge qarjy jumsalady. Bul týraly Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde Eńbek jáne halyqty áleýmettik qorǵaý mınıstriniń mindetin atqarýshy Tamara Dúısenova aıtty, dep habarlaıdy QazAqparat tilshisi.

«Memleket basshysynyń tapsyrmalaryn oryndaý úshin mınıstrlik mynadaı baǵyttarda jan-jaqty jumys júrgizip jatyr. Birinshiden, ana men balany áleýmettik qoldaý eskerilgen. Bıyl áleýmettik tólemder 2 mıllıonnan asa otbasyǵa beriledi, oǵan 1,2 trıllıon teńge qarjy jumsalady», - dedi T. Dúısenova.

Onyń aıtýynsha, Memleket basshysynyń tapsyrmalaryn oryndaý aıasynda bıylǵy 1 qańtardan bastap bala kútimi boıynsha áleýmettik tólemderdi tóleý kezeńi bir jyldan bir jarym jylǵa deıin uzartyldy.

Osy jyldyń І toqsanynda ony alýshylardyń jalpy sany 435 myń adamnan asty. Onyń ishinde jumys istemeıtin 93 myń ana járdemaqyny respýblıkalyq bıýdjetten, al jumys istegen 343 myńnan astam adamǵa Memlekettik áleýmettik saqtandyrý qorynan tólenip jatyr.

«Mundaı tólemderdi bıyl dúnıege kelgen jáne byltyr týǵan, biraq jasy áli 1-ge tolmaǵan balalary bar 760 myń otbasy alady dep josparlap otyrmyz. Bul maqsatqa 334,5 mıllıard teńge kózdelgen», - dedi mınıstrdiń mindetin atqarýshy.

«Ataýly áleýmettik kómek alýshy otbasylardaǵy 1 jastan 6 jasqa deıingi balalarǵa arnalǵan paket bıyldan bastap aqshalaı berilip jatyr. Búginde osy sanattaǵy 114 myńnan astam balaǵa 1,4 mıllıard teńge áleýmettik kómek berildi. Ataýly áleýmettik kómekke qajet 74 mıllıard teńge balalarǵa arnalǵan aqshalaı tólemderdi qosa eseptegende, óńirlerge jalpy sıpattaǵy transferttermen berildi», - dedi T. Dúısenova.