Bıyl álemdik ekonomıkanyń ósýi 3,7 paıyz deńgeıinde bolady dep kútilýde - E. Dosaev
ASTANA. QazAqparat - Halyqaralyq Valıýta qorynyń boljamy boıynsha byltyrǵy jyly álemdik ekonomıkanyń ósimi 3 paıyzdy qurady. Al aǵymdaǵy jyly álemdik ekonomıkanyń anaǵurlym joǵary 3,7 paıyzdyq deńgeıinde ósim kútiledi. Búgin Parlament Májilisindegi Úkimet saǵatynda Ekonomıka jáne bıýdjettik josparlaý mınıstri Erbolat Dosaev osylaı málim etti.
Mınıstrdiń aıtýynsha, álemdik ekonomıkanyń neǵurlym joǵary damýyna damyǵan elderdegi ekonomıkalyq ósýdiń qalpyna kelýi áser etetin bolady.
«AQSh ekonomıkasynyń ósimi 2013 jylǵy 1,9 paıyzǵa qaraǵanda, 2014 jyly 2,8 paıyzdyq deńgeıinde boljanady. Eýro aımaq eksport kóleminiń artýy jáne tutynýshylyq suranystyń qalpyna kelýi nátıjesinde retsessııadan ótedi. Eki jylǵy quldyraýdan keıin alǵash ret 1 paıyzdyq ósý kútiledi», - dedi mınıstr.
Onyń sózine qaraǵanda, damýshy ekonomıkalarda ósý qarqynyń baıaýlaýy kútiledi. Máselen, Qytaı ekonomıkanyń ósýi 2013 jyly 7,7 paıyz bolǵan bolsa, 2014 jyly 7,5 paıyz deńgeıinde kútiledi. Al Reseı ekonomıkasy 2013 jylǵy 1,3 paıyzdyq quldyraýdan keıin 2 paıyzǵa deıin ulǵaıady.
«Qazaqstan ekonomıkasynyń odan ári ósýi eń aldymen negizgi qorlardy tehnologııalyq jańǵyrtýǵa, eńbek ónimdiligin arttyrýǵa, adamı kapıtal men ınstıtýtsıonaldyq ortanyń sapasyna negizdelýi tıis», - deıdi E. Dosaev.
