Bıyl Aqtóbede 2 myń páter beriledi
AQTÓBE. QazAqparat - 2020 jyly Aqtóbede aýmaǵy 100 myń sharshy metr bolatyn turǵyn úı paıdalanýǵa berý jospary bar. Bul - 1999 páterden turatyn 4 toǵyz qabatty jáne 21 az qabatty úı, dep habarlaıdy QazAqparat tilshisi qala ákiminiń baspasóz qyzmetine silteme jasap.
Baspanalardy Turǵyn úı qurylys jınaq bankiniń salymshylary arasynda jáne «7-20-25» baǵdarlamasy aıasynda satý josparlanyp otyr. Bul týraly keshe qala ákimi Mavr Abdýllınniń tóraǵalyǵymen ótken apparat jıynynda turǵyn úı qatynastary bólimi basshysynyń mindetin atqarýshy Erlan Ramazanov aıtyp berdi.
«2019 jyly «Baqytty otbasy» baǵdarlamasy aıasynda kezekte turǵan kópbalaly, tolyq emes jáne múmkindigi shekteýli balalary bar 1400 otbasy joldama alyp, 485 otbasy baspanaly boldy. Aqtóbe qalasy respýblıka boıynsha alǵashqy úshtikten kirdi. Qazir taǵy 70 úmitker otbasynyń tólem qabileti tekserilýde. Sebebi 2020 jyly naýryz aıynda «Baqytty otbasy» baǵdarlamasynyń ekinshi kezeńi bastalady», - dep habarlady qala ákiminiń baspasóz qyzmeti.
