Bıyl Aqtóbe oblysynda 718 myń gektarǵa egin egiledi
Onyń ishinde 368,3 myń gektar jerge dándi jáne burshaqty daqyl, 88 myń gektarǵa maıly daqyl, 250 myń gektarǵa mal azyǵy, 6,6 myń gektarǵa kartop, 5,5 myń gektarǵa baqsha daqyldary egilmek.
Qazirgi kezde kóktemgi egin naýqanyna daıyndyq júrip jatyr. Aqtóbe oblysy boıynsha Áıteke bı, Hromtaý, Qarǵaly, Mártók aýdandarynda jumys qarqyny basym. Sharshýalarǵa barlyǵy 49 myń tonnadan astam tuqym qajet bolsa, qazir qoımada saqtalǵany 53 myń tonnadan asady. Byltyr ónim mol túsip, bıyl onyń paıdasy tıdi.
«Bıyl jaýyn-shashyn kólemi byltyrǵyǵa qaraǵanda edáýir joǵary. Kúzdegi jaýyn kezinde jerge ylǵal mol sińip, toń 1 metrge jetti. Bul egis jumystaryna oń ásir etedi. Aýyl sharýashylyǵy qurylymdary muny sátti paıdalana alady dep oılaımyz. Tipti egis kólemin de arttyrýǵa bolady. Sonymen birge qardyń qalyńdyǵy kem degende 30 sm qurady. Qar toqtatý jumysy da qarqyndy. Bıyl 80 myń gektar jerde qar toqtarý jumysy júrgizildi», - dedi oblystyq Aýyl sharýashylyǵy basqarmasy basshysynyń orynbasary Isataı Espaǵanbetov.
Bıyl oblysqa 9800 tonna dızel otyny bólindi. Barlyǵy 560 sharýa qojalyǵyna beriledi. Jetkizýshi operatorlar anyqtalyp, baǵasy lıtrine 207-211 teńgeni quraıdy.
«Bıyl aýyl sharýashylyǵy parkin jańartý jumysy jalǵasady. Sharýalar qarjyny qarjy ınsıtýttary arqyly alady. Bıyl 1140 tehnıka satyp alynady. Onyń 500-den astamy mal azyǵyn daıyndaıtyn tehnıka. Traktor da asa qajet», - dedi Isataı Espaǵanbetov.
«Keń dala» baǵdarlamasy aıasynda óńirge 2 mlrd teńgege jýyq qarjy bólindi. Ótinim qabyldanyp jatyr. Sýbsııadııaǵa bólingen qarjy kólemi – 1,3 mlrd teńge. Onyń 480 mln teńgesi tuqym sharýashylyǵyn damytýǵa baǵyttalady. Al 323 mln teńgesi mıneraldy tyńaıtqysh alýǵa jumsalady.
