Bıyl Aqtóbe oblysynda 15 jańa mektep salynady
AQTÓBE. QazAqparat - Aqtóbe oblysy boıynsha bıyl 15 mektep paıdalanýǵa beriledi, dep habarlaıdy QazAqparat tilshisi.
Aqtóbe oblysynda úsh aýysymdy jáne apatty mektepterdi joıý jumystary júrip jatyr. Qazirgi kezde Aqtóbe qalasyndaǵy 6 mektep pen oblys aýdandarynda ornalasqan 7 mektep úsh aýysymda jumys istep tur.
«Sońǵy úsh jyldyń ishinde oblysta 48 jańa mektep paıdalanýǵa berilgen. Olardyń ashylýy úsh aýysymdyq oqytý men 27 mekteptegi oryn tapshylyǵy máselesin kún tártibinen birden alyp tastady. Apattyq jaǵdaıda turǵan jáne eski 9 mektepti, saman kirpishten salynǵan 12 mektepti joıýǵa múmkindik berdi. Bıyl 15 jańa mekteptiń qurylysy aıaqtalady. Jańa bilim berý nysandarynyń arasynda óz erekshelikteri bar. Máselen, daryndy balalarǵa arnalǵan «Ásem» oqytý-tanymdyq ortalyǵy. Balalar munda oqýdan qol úzbeı tynyǵa alady. ıAǵnı, ortalyq jyl boıy jumys isteıdi. Oqý korpýsy zamanaýı zerthanalarmen jáne oqý aýdıtorııalarymen jabdyqtalǵan. Mektepter men joǵary oqý oryndarynyń jetekshi oqytýshylary, sondaı-aq ártúrli salalarda tabysqa qol jetkizgen adamdar sabaq beredi. Úsh jatyn korpýsy, jastar ortalyǵy, sporttyq alańdar, jeńil atletıkamen aınalysatyn baza ornalasqan», - dedi oblys ákiminiń baspasóz qyzmetinen.
Jospar boıynsha 2020 jylǵa qaraı Aqtóbe oblysyndaǵy apattyq mektepter men úsh aýysymdyq oqytý máselesi tolyqtaı joıylady.
Aıta keteıik, qazirgi kezde bilim salasyn ońtaılandyrý jumysy da júrip jatyr.
«Aqtóbede memlekettik normatıvke saı emes 58 mektep bar. Monıtorıng nátıjesin saraptasaq, sońǵy úsh jylda 33 shaǵyn jınaq mektebi jabyldy. Árbir aýdandyq bilim bólimi 12 jyldyq bilim berý úlgisin eskere otyryp, kontıngenti az, turǵyndarynyń ósý dınamıkasy joq mektepterge taldaý júrgizildi. Basym bóligi Áıteke bı, Qarǵaly, Qobda, Muǵaljar, Hromtaý aýdandarynyń úlesinde. Ótken jyly 13 bastaýysh, 1 negizgi mektep jabyldy. 2019 jyly 5 mektep jabylyp, 7 mektep qaıta qurylady», - dedi Lázzat Orazbaeva.
Mektepter jabylǵanymen, aýdandarda zamanaýı 7 mektep-ınternat salynady.
