Bıyl Aqtóbe oblysynda 12 bala ózine qol jumsaǵan
AQTÓBE. QazAqparat – Bıyl kámelet jasyna tolmaǵan 12 bala ózine qol salǵan. Tórteýi kóz jumdy. Polıtsııa zerdeleý jumysyn qorytyndylady, dep habarlaıdy QazAqparat tilshisi.
Oblystyq polıtsııa departamenti jergilikti polıtsııa qyzmeti basqarmasy kámeletke tolmaǵandar arasynda tirkelgen óz-ózine qol jumsaý faktisine taldaý júrgizdi.
Bıyl oblysta 10 aıda 12 jaǵdaı tirkelip, 4 jasóspirim kóz jumdy.
«Aqtóbe qalasynda 9 jaǵdaı tirkelip, 2 bala mert boldy. Sonymen birge Hromtaý aýdanynda 2, Alǵada bir oqıǵa belgili boldy. Oblys boıynsha óz-ózine qol jumsaǵandardyń kóbi mektep oqýshysy ekeni anyqtaldy. 12 derektiń jeteýi mektep balasy bolyp shyqty. Bireýi 10 jasta. Balalar asylady, dári-dármek jáne sirke sýyn iship qoıady. Bıik ǵımarattan qulap, moıny men qolyna pyshaq jaraqatyn salatyndary da bar», - dep habarlady oblystyq polıtsııa departamenti jergilikti polıtsııa qyzmeti basqarmasynyń baspasóz qyzmeti.
Taldaý kezinde otbasyndaǵy, týǵan-týys arasyndaǵy daý-janjalǵa balalardyń tózbeıtini belgili boldy. Jaýapsyz mahabbat, ákesinen aıyrylǵan balanyń jan qaıǵysy da - negizgi sebeptiń biri.
«Eki jasóspirim kóz jumyp, ólimniń naqty sebebi anyqtalmady. Zerdeleı kele sýıtsıdtiń 60% jýyǵy otbasyndaǵy daý-damaıdan soń tirkeletini belgili boldy. Bir ereksheligi - turǵylyqty jeri men oqý oryndary bergen minezdeme jaqsy. Tolyq, aýqatty otbasynda tárbıelengen, ishki ister organdarynda tirkelmegen. Sondyqtan balamen tyǵyz qarym-qatynas ornatyp, barlyq máseleni aqylmen sheshýge bolatynyn uǵyndyryńyz» dep jazylǵan jergilikti polıtsııa qyzmeti basqarmasynyń habarlamasynda.
