Bıyl Aqtaýda 15 mektepke jóndeý jumystary júrgizildi

AQTAÝ. QazAqparat - Aqtaýda «Jumyspen qamtýdyń jol kartasy-2020» memlekettik baǵdarlamasy aıasynda birqatar bilim berý nysanyna jóndeý jumystary júrgizildi, dep habarlaıdy QazAqparat tilshisi.

Atap aıtsaq, № 1, 2, 8, 9, 10, 12, 14, 16, 17, 20, 21, 22, 27 orta mektepteri men №19 «Tolaǵaı», №29 balabaqsha, №56«Juldyz», №59 S.Shapaǵatov atyndaǵy balabaqshalarǵa aǵymdaǵy jóndeý jumystary júrgizildi. Bul maqsatta bıýdjetten 172 164,0 myń teńge bólingen.

Sonymen qatar, 29 shaǵynaýdanda ornalasqan №28 jalpy bilim beretin orta mektepke (jalpy quny– 654 138,0 myń teńge, merdiger mekeme - «Ońdasyn stroı» JShS) jáne 15 shaǵynaýdanda ornalasqan IT mektep-lıtseıine (jalpy quny- 497 300,0 myń teńge, merdiger mekeme - «Nurly Jol Qurylys» JShS) kúrdeli jóndeý jumystary júrgizilýde. Qazirgi tańda eki bilim ordasynda da jumystardyń 87%-y aıaqtaldy.

«Qazirgi tańda baǵdarlama aıasynda qalamyzdyń jumyssyzdyq esebinde turǵan 329 azamaty jumyspen qamtyldy. Olardyń eńbekaqysy 85 myń teńgeden joǵary boldy. Merdiger mekemeler tasymalmen jáne túski aspen qamtamasyz etti. Jalpy, balabaqshalardan tórteýiniń de jóndeý jumystary tolyqtaı bitti. Al, mektepterden (15) tek 6 mekteptiń jóndeý jumystary áli júrgizilýde. Tolyqtaı tamyz aıynyń aıaǵynda paıdalanýǵa beriledi dep josparlanyp otyr»,-dedi Aqtaý qalalyq bilim bóliminiń basshysy Svetlana Týlebaeva.

Baǵdarlama aıasynda jóndeýden ótken Aqtaýdaǵy №29 balabaqshada Abaı̆dyń, Ábish Kekilbaevtyń ómirinen syr shertetin sýretter jınaqtalǵan burysh jasaqtalǵan. Bóbekjaı dırektory Nabat Syrymbaevanyń aıtýynsha, 280 orynǵa shaqtalǵan nysanda qabyrǵalar tolyǵymen syrlanǵan.

«Aǵymdaǵy jóndeý jumystary aıasynda dálizderdegi qabyrǵalar syrlanyp, eden tósenishteri aýystyrylyp, esikter jańardy. Jumyssyzdyqta tirkelgen 3 azamat qyzmet etip, jumysyn aıaqtady»-,dedi Nabat Syrymbaeva.