Bıyl Aqtaý portynyń ótkizý qýaty 1 mln. tonnaǵa deıin artady - A. Jumaǵalıev
ASTANA. 1 sáýir. QazAqparat - Bıyl Aqtaý portynyń ótkizý qýaty burynǵyǵa qosymsha 1 mln. tonnaǵa deıin ósedi.
Bul týraly búgin Parlament Májilisinde ótip jatqan Úkimet saǵatynda Kólik jáne kommýnıkatsııa mınıstri Asqar Jumaǵalıev málim etti.
Mınıstrdiń sózine qaraǵanda, byltyr Aqtaý porty arqyly 11 mln. tonna munaı jáne basqa da júkter tasymaldanǵan. Bul óndiris josparyn 105 paıyzǵa arttyrdy. Al port klıentterine kórsetiletin qyzmettiń basym bóligi avtomattandyrylǵan. Nátıjesinde qujattardy rásimdeý ýaqyty alty saǵattan 45 mınýtqa deıin qysqarǵan.
«Bıylǵy jyly porttyń óndiristik úderisterin avtomattandyrý jumystary aıaqtalatyn bolady. Nátıjesinde júkterdi jóneltý men óńdeý merzimderi 29 paıyzǵa azaıtylyp, óndiris qýaty 1 mln. tonnaǵa arta túsedi», - deıdi mınıstr.
Budan bólek, Elbasynyń tapsyrmasyna sáıkes Aqtaý portyn odan ári damytý, keńeıtý jumystary jalǵasady. «Porttyń ótkizý qabiletin 2,5 mln. tonnaǵa ulǵaıtý úshin qosymsha úsh qurǵaq júk termınalyn salý josparlanýda», dedi A. Jumaǵalıev.
