Bıyl Aqtaý portynan Túrkııaǵa júk tasymaly úsh ese artady
Búgin Parlament Májilisiniń jalpy otyrysynda «Teńiz keme qatynasy qaýipsizdigine qarsy baǵyttalǵan zańsyz is-árekettermen kúres týraly konventsııaǵa 2005 jylǵy hattamany ratıfıkatsııalaý týraly» zań jobasy maquldandy.
«Hattama lańkestik dep tanylatyn áreketterdiń tizimin keńeıtedi. Kemelerge shabýyl jasalǵan jaǵdaıda jedel áreket etý men kómek kórsetý tetikterin anyqtaıdy. Búginde 40-tan astam memleket qujattyń qatysýshysy bolyp otyr ári olardyń ishinde Qara teńiz ben Baltyq teńizi mańyndaǵy barlyq memleket bar. Qazir Qazaqstannyń saýda kemeleri ashyq teńizderge, sol teńizderdiń porttaryna deıingi baǵyttardy belsendi túrde ıgere bastady. Ótken jyly Aqtaý portynan Túrkııaǵa 35 myń tonna basty júkter tasymaldandy. Bıyl bul tasymaldyń kólemin úsh esege arttyramyz dep josparlap otyrmyz», - dedi Investıtsııalar jáne damý mınıstri Jeńis Qasymbek.
Onyń sózine qaraǵanda, Reseıdiń ishki sý joldarynda Qazaqstan kemeler úshin jeńildetilgen tranzıttik tártibin engizý RF-pen EAEO aıasynda qol jetkizildi. Osy oraıda tıisti kelisim bar jáne bul baǵytta tasymaldaý kólemin arttyrýǵa yqpal etedi.
«Hattamany ratıfıkatsııalaý ashyq teńizde júzetin otandyq kemelerdiń qaýipsizdigin qamtamasyz etýdiń quqyqtyq kepildikterin kúsheıtýge yqpal etedi. Sonymen qatar, qujatty maquldaý bıýdjetten qosymsha qarjy bólýdi talap etpeıdi», - dep túsindirdi mınıstr.