Bıyl aqmolalyq oqýshylar qaıda demalady

KÓKShETAÝ. QazAqparat – Pandemııa kezinde Aqmola oblysyndaǵy balalar men jasóspirimderdi saýyqtyrý úshin mazmundy demalys uıymdastyrylady. Bul týraly brıfıngte oblystyq bilim basqarmasy basshysynyń orynbasary Botakóz Dúısenova aıtty, dep habarlaıdy QazAqparat tilshisi.

Basqarma basshysy orynbasarynyń aıtýynsha, QR Bilim jáne ǵylym mınıstrligi balalardyń bos ýaqytyn durys uıymdastyrý úshin «Qazaqstan balalary, jazdy shattyqpen ótkizeıik!» tujyrymdamasyn ázirleýde. Búginde oblys boıynsha 1-10 synyp aralyǵynda 120 myń oqýshy bilim alady. Bıyl balalar men jasóspirimder qalypty jaǵdaıda demalyp, densaýlyǵyn túzeý úshin qala syrtynda 20 jazǵy demalys lageri jumys istep, 14 000 bala qamtylady.

«Barlyǵy óńirdegi epıdemıologııalyq jaǵdaıǵa baılanysty. Eger jaǵdaı durys bolyp, sanıtarlyq qyzmet ruqsat berip jatsa, lagerler shtattyq rejımde jumys isteıdi. ıAǵnı, óńirdegi qala syrtyndaǵy lagerlerdiń jumysy 15 maýsymnan bastalady», - deıdi Botakóz Dúısenova.

Basqarma basshysynyń orynbasary atap ótkendeı, oqýshylardyń 70 paıyzy 454 profıldi alańdar jáne jazǵy demalystyń shyǵyny az túrimen qamtamasyz etiledi. «Rýhanı jańǵyrý» baǵdarlamasy boıynsha 10 myń oqýshy Aqmola oblysynyń kıeli oryndaryna tanymdyq saıahat jasaıdy.

Bıylǵy jyldyń maýsym-shilde aılarynda 100 oqýshy «Bir apta aýylda» jáne «Bir apta qalada» áleýmettik bastamasyna qatysady. Esil, Ereımentaý, Jarqaıyń jáne Shortandy aýdandarynda «Týǵan ólkeni zertteımiz» tarıhı-ólketaný ekspedıtsııasy ótedi.

Al, Astrahan, Ereımentaý, Jaqsy, Zerendi jáne Býrabaı aýdandarynda mektep oqýshylarynyń qatysýymen arheologııalyq ekspedıtsııa uıymdastyrylady.

Bilim uıymdary janyndaǵy mýzeıde 237 ólketaný úıirmesi júrgiziledi. Ár aýdanda jalpy 5 myńnan astam oqýshynyń qatysýymen «Uly Dala eli» dala ekspedıtsııasy ótkiziledi.