Bıyl Aqmola oblysynda bir myń shaqyrym jol jóndeledi

BÝRABAI. QazAqparat - Bıyl Aqmola oblysynda bir myń shaqyrym jol jóndeledi. Bul týraly 2022 jyldyń 5 aıynyń qorytyndysy boıynsha óńirdiń áleýmettik-ekonomıkalyq damýyna arnalǵan baspasóz máslıhatynda aımaq basshysy Ermek Marjyqpaev málim etti, dep habarlaıdy QazAqparat tilshisi.

Ákimniń aıtýynsha, óńirde kólik kommýnıkatsııalaryn tıisti jaǵdaıda ustaý boıynsha maqsatty jumystar júrgizilýde. Qalalar men aýdandardaǵy jergilikti mańyzy bar, sondaı-aq oblystyq jáne respýblıkalyq mańyzy bar avtojoldar jóndelmekshi.

«Ótken jyly jergilikti mańyzy bar avtojoldardy salýǵa, jóndeýge 232 joba boınysha 38 mlrd teńge qarjy bólindi, onyń ishinde 172 joba boıynsha jumystar aıaqtaldy. Oblystyq, aýdandyq mańyzy bar 800 km avtojol jáne eldi mekenderdiń kóshe-jol jelisi jóndeldi. Bıyl 1 myń km jol jelisin jaqsartýdy josparlap otyrmyz. Nátıjesinde jaqsy jáne qanaǵattanarlyq jaǵdaıdaǵy jergilikti mańyzy bar avtojoldardyń úlesi 87 paıyzǵa jetedi», - dep atap ótti Ermek Marjyqpaev.

Aıta ketsek, 2016 jyldan bastap jol qurylysy men jóndeý jumystarynyń kólemi 4 esege artty. 7 jyl buryn jylyna 162 shaqyrym jol jóndelse, 2021 jyly bul kórsetkish 790 shaqyrymdy qurady.

Eske sal keteıik, budan buryn Aqmola oblysyndaǵy egistik jer kólemi 5,1 mln gektarǵa jetkenin jazǵan bolatynbyz.