Bıyl Aqmola oblysynda 78 aýyl sharýashylyǵy kooperatıvi qurylmaq
KÓKShETAÝ. QazAqparat - Bıyl Aqmola oblysynda 78 aýyl sharýashylyǵy kooperatıvi qurylady. Bul týraly oblystyq aýyl sharýashylyǵy basqarmasynyń basshysy Murat Balpan málim etti, dep habarlaıdy «QazAqparat» HAA tilshisi.
Basqarma basshysynyń sózine qaraǵanda, elimizde 2017-2021 jyldarǵa arnalǵan aýyl sharýashylyǵy keshenin damytý baǵdarlamasy júzege asyrylýda. Onyń ishinde óńirde aýyl sharýashylyǵy kooperatıvterin damytýǵa erekshe kóńil bólinip otyr.
«Bıyl oblys boıynsha 78 aýyl sharýashylyǵy kooperatıvin qurk josparlanǵan. Onyń 48-i et baǵytyndaǵy da, 30-y sútti baǵyttaǵy. Qazirdiń ózinde Ereımentaý aýdanynda-12, Jaqsy aýdanynda-7, Zerendi aýdanynda-6, Atbasar, Esil jáne Shortandy aýdandarynda 4 kooperatıvten qurylyp otyr. Bul qurylatyn kooperatıvterdiń 30 sýt qabyldaıtyn pýnkterdi ashýǵa baǵyttalyp otyr. Bul baǵytta Atbasar, Býrabaı, Jaqsy jáne Zerendi aýdandary jospardy oryndap otyr», deıdi basqarma basshysy.
Sonymen qatar, oblysta 3040 bas iri qaraǵa arnalǵan 320 mal bordaqylaý alańyn ashý josparda bar. Bul baǵytta qazirgi tańda 220 bas iri qara satyp alynǵan. Oǵan qosa, sút baǵytynda 678 bas saýyn sıyrlary satyp alyndy. Osy oraıda, 293 jáne 266 bas iri qara satyp alǵan Zerendi jáne Atbasar aýdandary belsendilik tanytyp otyr.
Jalpy, aýyldyq jerlerde aýyl sharýashylyǵy kooperatıvterin qoldaý úshin oblysqa 2 mıllıard 12 mıllıon teńge qarjy bólingen. Bul qarjy «Aýyl sharýashylyǵyn qarjylaı qoldaý» AQ (1 mıllıard 185 mıllıon 137 myń) jáne «Agrarly nesıe korporatsııasy» AQ (826 mıllıon 863 myń) arqyly bólinip otyr. Sondaı-aq, osy baǵytta aýyldaǵy turǵyndardy nesıeleý úshin «Aýyl sharýashylyǵyn qarjylaı qoldaý» AQ Aqmola oblystyq fılıalynyń 1,3 mıllıard óz qarjysy bar ekenin aıta ketken jón.
