Bıyl Aqmola oblysynda 5,1 mıllıon gektarǵa tuqym sebiledi
Oblystyq aýyl sharýashylyǵy basqarmasynyń málimetinshe, qazirgi ýaqytta óńirde kóktemgi egis naýqanyna daıyndyq jumystary qyzý júrgizilýde.
«Naýqanǵa barlyǵy 18 myńnan astam tuqym sebetin tehnıka men ónimdiligi joǵary egis kesheni jumyldyralady. Zamanýı aýyl sharýashylyǵy tehnıkasynyń kúshimen egistik alqabynyń 70 paıyzdan astamyn eńserý kózdelgen. Osy baǵytty bıylǵy jyldyń basynan beri 9 mıllıard teńge qarjyǵa 229 aýyl sharýashylyǵy tehnıkasy satyp alyndy. Onyń 65 traktor, 48 kombaın, 22 egis kesheni jáne 94 basqa da túrli tehnıka», - dedi vedomstvodan.
Sonymen birge, bıylǵy jylǵy tuqym sebý jumystaryna qajetti 530 myń tonna tuqym qory da bar. Óńirde dıqandardy qajetti janar-jaǵar maımen qamtamasyz etý máselesi de birtindep sheshilýde.
«Osy rette, aımaqqa Úkimet tarapynan arzandatylǵan baǵamen 72 myń tonna kepildendirilgen dızel otyny bólindi. Bul qajetti qordyń 95 paıyzy. Qazirgi ýaqytta, dızel otynyna tólem júrgizý jáne otynnyń ózin aýdandyq termınaldarǵa jetkizý jumystary júrgizilýde. Dızeldik otynnyń 1 lıtriniń baǵasy 208 teńgeni quraıdy. Mıneraldy tyńaıtqyshtar satyp alý jumystary da odan ári jalǵasýda. Búgingi tańda jospardaǵy 100 myń tonna tyńaıtqyshtyń 37 myń tonnasy satyp alyndy», - dedi vedomstvodan.
Búginge deıin kóktemgi-dala jumystaryn nesıeleýge óńirde «Keń dala» baǵdarlamasy boıynsha «QazAgro» fılıaldary arqyly 2,6 mıllıard teńgeniń somasyna 76 ótinim qarjylandyryldy. Budan bólek, «Azyq-túlik korporatsııasy» ulttyq kompanııasy arqyly «Kókshe» áleýmettik-kásipkerlik korporatsııasynyń kepildigimen aýyl sharýashylyǵy ónimin forvardtyq satyp alý jumystary júrgizilýde. Osy maqsatqa Úkimet tarapynan 23 mıllıard teńge bólinip, osy qarjynyń esebinen 13 mıllıard teńge kóleminde 67 ótinim qarjylandyryldy.
«Jalpy, bıyl Aqmola oblysynda 5,1 mıllıon gektarǵa tuqym sebý josparlanǵan. Onyń ishinde 4,6 mıllıon gektary dándi daqyldar. Bul josparlanyp otyrǵan egistik kólemi byltyrǵy jylmen salystyrǵanda 53,4 myń gektarǵa kóp. Dándi daqyldardan bólek, 17 myń gektar jerge kartop, 2,7 myń gektardan astam jerge kókónis otyrǵyzý josparlanýda. Mal azyǵy daqyldary da 185,5 myń gektarǵa sebiletin bolady», - dep tolyqtyrdy vedomstvodan.