Bıyl Aqmola oblysynda 3 myńnan astam memlekettik qyzmetshi attestatsııalaýdan ótedi

KÓKShETAÝ. QazAqparat - Bıyl Aqmola oblysynda 3224 memlekettik qyzmetshi attestatsııalaýdan ótedi. Bul týraly óńirlik kommýnıkatsııalar qyzmetinde ótken «B» korpýsynyń memlekettik qyzmetshilerin keshendi attestattaý» taqyrybyndaǵy brıfıngte Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Bergen Bespalınov málim etti.

Onyń aıtýynsha, búgingi tańda oblysta 706 memlekettik organ jumys isteıdi. Bul organdarda 5962 memlekettik laýazym bolsa, onyń  7-i saıası da, 25-i «A» korpýsynyń memlekettik laýazymdary.

«Ýákiletti organ ázirlegen keshendi attestattaýdy ótkizýdiń tásildemelerine sáıkes, jekelegen sanattardy qospaǵanda, oblysta 3224 memlekettik qyzmetshi attestatsııalaýdan ótedi. Testileýdi kúnine 4 lekten ótkizý josparlanyp otyr. Testileý zalyndaǵy jumys stantsııalarynyń (kompıýterlerdiń) sany-34. Onda bir kúnde 136 adam testileýden óte alady. Osyǵan baılanysty aǵymdaǵy jyldyń qańtar aıynan bastap, maýsym aıyna deıingi aldyn ala jelilik kestesi ázirlenip, attestattaýdan ótý kezeginiń tizimi jasaldy»,- dedi B.Bespalınov.

Sonymen qatar, departament basshysy zeınet jasyna 2 jyl qalǵan, aıaǵy aýyr, bala kútý demalysyndaǵy jáne 6 aı eńbek ótili joq tárizdi sanattaǵy memlekettik qyzmetshilerdiń attestatsııalaýdan bosatylatynyn da atap ótti.