Bıyl Aqmola oblysynda 15 myńnan astam bala mektep tabaldyryǵyn attaıdy
Sharada oblystyq bilim basqarmasy basshysynyń mindetin atqarýshy Valerıı Gamazov atap ótkendeı bıylǵy jyly oblys boıynsha barlyǵy 115 myń oqýshy mektepke barady. Onyń 15 482-si tuńǵysh ret birinshi synypqa baratyn balalar.
Valerıı Gamazovtyń aıtýynsha, oblystyq bilim basqarmasy el Prezıdentiniń alǵa qoıǵan mindetteri men maqsattaryn júzege asyryp, jas urpaqqa sapaly bilim berý jolynda jańa serpindi rýhta júıeli jumys atqaryp keledi.
«Oblysta 18 bilim nysanynyń qurylysy jáne qalpyna keltirý jumystary bastaldy. Onyń ishinde 7-ýi mektep. Aǵymdaǵy jyly onyń 2-ýi paıdalanýǵa beriledi. Oǵan qosa, bilim berý nysandaryna kúrdeli jóndeý jumystaryn júrgizý úshin 1,4 mıllıard teńgeden astam qarajy bólindi. Sonymen qatar, materıaldyq-tehnıkalyq bazany nyǵaıtýda qolǵa alynǵan. Máselen, 1,1 mıllıard teńgeden astam qarjyǵa oqýlyq satyp alyndy. 460 mıllıon teńgeden astam qarjyǵa mýltımedııalyq jáne jańa úlgidegi oqý kabınetteri men jabdyqtar satyp alyndy», dedi basqarma basshysy.
Shara barysynda bilim salasyndaǵy túıtkildi máseleler talqylanyp, aldaǵy 2017-2018 oqý jylynyń mindetteri belgilendi.
Osy oraıda, oblys ákiminiń orynbasary Aına Mysyrálimova pedagogtar qaýymyn quttyqtaı kele, keleshek jastardy otansúıgishtikke, patrıotızmge tárbıeleýge baǵyttalǵan «Rýhanı jańǵyrý» baǵdarlamasyn júzege asyrý máselesine toqtaldy.
«Bul baǵdarlamanyń negizi týǵan aýyl, qala, ólkege, onyń tarıhy men mádenıetine degen mahabbattan turady», - dedi A.Mysyrálimova óz sózinde.
Konferentsııa sońynda oblys ákiminiń orynbasary Aına Mysyrálimova bilim berý salasynda jaqsy jetistikterge qol jetkizgen muǵalimder men oqý oryndarynyń basshylary, balabaqsha tárbıeshileri oblys ákiminiń Alǵys hattarymen marapattady. Sondaı-aq, Qazaqstan Respýblıkasy Bilim jáne ǵylym mınıstrliginiń ókili, zań qyzmeti jáne halyqaralyq yntymaqtastyq departamentiniń dırektory Nurseıit Baıjanov birqatar ustazdarǵa Y.Altynsarın jáne «Bilim berý isiniń úzdigi» tósbelgilerin tapsyrdy. Sońǵy jyldary oblystyq bilim basqarmasy «Bilim salasynyń úzdik uıymy» atty oblystyq baıqaýyn dástúrli uıymdastyryp keledi. Bıylǵy jyly baıqaýǵa 13 uıymnan ótinishter kelip túsken. Solardyń arasynda baıqaý jeńimpazy atanǵan Kókshetaý qalasyndaǵy №5 «Tańdaý» mektep-gımnazııasy úzdik dep tanylyp, 19 567 200 teńgege aqshalaı arnaıy sertıfıkat tapsyryldy. Sonymen qatar, Astana qalasyndaǵy №2 daryndy balalarǵa arnalǵan mamandandyrylǵan mektep-ınternatynyń ujymy respýblıkalyq «Bilim salasynyń eń úzdik mamandandyrylǵan bilim mekemesi» baıqaýynda júldeli 3 orynnan kórinip, arnaıy syılyqqa ıe boldy.
