Bıyl Aqmola oblysynda 148 kópbalaly otbasy baspanaly bolady

KÓKShETAÝ. QazAqparat - Bıyl Aqmola oblysynda jaldamaly baspana baǵdarlamasy boıynsha kópqabatty 11 turǵyn úı salynyp, 148 kópbalaly otbasy baspanaly bolady, dep habarlaıdy QazAqparat tilshisi.

Aqmola oblystyq ishki saıasat basqarmasynyń málimeti boıynsha, bıylǵy jyly óńirde 498 otbasyn baspanamen qamtý josparlanǵan, onyń ishinde 148-i kópbalaly otbasylar.

«Kóppáterli turǵyn úıler bıyl Kókshetaý, Stepnogorsk qalalary men Atbasar, Shortandy, Jaqsy, Bulandy jáne Jarqaıyń aýdandarynda paıdalanýǵa beriledi», - dep atap ótti basqarmanyń qurylys bólimi basshysy Gúlmıra Tasova.

Sonymen birge, kópbalaly jáne áleýmettik jaǵynan az qamtylǵan otbasylarǵa jergilikti kásipkerler de úı satyp áperýdi josparlap otyr.

Osy baǵytta oblys ákimdigi men bıznes ókilderiniń arasynda memorandýmǵa qol qoıyldy.

Bıylǵy jyly Kókshetaý qalasyndaǵy «Kókshetaý sút zaýyty» JShS, Jaqsy aýdanyndaǵy «Agrofırma TNK» JShS, Arshaly aýdanyndaǵy «AIZET FARMS» JShS, Atbasar aýdanyndaǵy «Nur 777» JShS sııaqty birqatar seriktestikter muqtaj 15 otbasyna baspana satyp áperýdi josparlap otyr.

Aıta ketý kerek, óńirde «Nurly jer» jáne «7-20-25» baǵdarlamalary boıynsha qoljetimdi turǵyn úı qurylysy júrgizilýde.

Qurylys basqarmasynyń deregi boıynsha, 2019 jyly 5,2 myń páter paıdalanýǵa berý josparlanǵan bolsa, onyń 889-y páter kezeginde turǵandar, turǵyn úı salymshylary, kópbalaly otbasylar men halyqtyń áleýmettik jaǵynan osal toptary.

Bıylǵy jyldyń alǵashqy 3 aıynda oblys boıynsha 1308 otbasy baspana máselesin jaqsartty.