Bıyl Aqmola oblysynda 120 myń adam tegin dári-dármekpen qamtamasyz etilmek
KÓKShETAÝ. QazAqparat - 2018 jyly áleýmettik medıtsınalyq saqtandyrý qory esebinen Aqmola oblysynda jalpy somasy 3,6 mıllıard teńgege 88 myń adam tegin dári-dármekpen qamtamasyz etildi, dep habarlaıdy QazAqparat tilshisi.
Al 2019 jyly 5 mıllıard teńgege 120 myń adamdy qamtamasyz etý josparlanyp otyr. Tegin beriletin dárilerdiń belgili bir tizbesi bar. Bul tizim QR Densaýlyq saqtaý mınıstrliginiń 2017 jylǵy 29 tamyzdaǵy №666 buıryǵynda kórsetilgen. Sonymen qatar, tegin dári-dármekterdi belgili bir dárihanalardan ǵana alýǵa bolady. Olardyń tizimin turǵylyqty jerde boıynsha tirkelgen emhanadan alýǵa bolady. Ambýlatorııalyq dári-dármekpen qamtamasyz etý sheńberinde barlyq preparattardy satyp alý jáne jetkizip berý boıynsha biryńǵaı dıstrıbıýtor retinde "SK-Farmatsııa" JShS anyqtaldy. Al, qarjylandyrý ÁMSQ qarajaty esebinen júzege asyrylady", dep málim etti Óńirlik kommýnıkatsııalar qyzmetinde ótken brıfıngte Aqmola oblysynyń densaýlyq saqtaý basqarmasy basshysynyń orynbasary Bolat Ábishev.
Al, "SK-Farmatsııa" JShS-niń Aqmola oblysy boıynsha ókili Roza Tilespaevanyń aıtýynsha, aǵymdaǵy jyldyń 28 qańtarynan bastap dári-dármekter jetkizile bastady.
"Aqmola oblysynda 235 mıllıon teńgeniń 177 ataýly dári-dármegi tıeldi. Kókshetaý qalasy boıynsha bul kórsetkish 105 mıllıon teńgege jetti. Qazirgi kezde, qańtar aıynyń qalǵany men aqpan aıynyń medıtsınalyq preparattardy jetkizilýde ", dep tolyqtyrdy "SK-Farmatsııa" JShS-niń Aqmola oblysy boıynsha ókili Roza Tilespaeva.
Sonymen qatar, ol tegin dári-dármekpen qamtamasyz etýge qatysty saýaldardy Qazaqstan Respýblıkasy boıynsha 1439 telefon nómirine tegin qońyraý shalyp, surap bilýge bolatyndyǵyn da atap ótti.
