Bıyl agroónerkásip salasynda 200-den astam joba iske asady

ASTANA. QazAqparat – QR Premer-Mınıstriniń birinshi orynbasary Roman Sklıar jyl basynan beri agroónerkásip kesheni boıynsha 180 ınvestıtsııalyq joba iske qosylǵanyn aıtty, dep habarlaıdy QazAqparat tilshisi.

«Egin jınaý nýqanyna toqtalsam, bıyl sońǵy 10 jylda bolmaǵan eń joǵary ónim aldyq. 23 mln tonna dándi jáne burshaq daqyldary jınaldy. Bul byltyrmen salystyrǵanda 27 paıyzǵa artyq. Bıdaıdyń jalpy túsimi 30 paıyzǵa ósti. Kókónis daqyldarynyń ortasha ónimdiligi byltyrmen salystyrǵanda 11 paıyzǵa ósti. Oǵan memlekettik qoldaý sharalary da yqpal etti», - dedi R. Sklıar.

Onyń aıtýynsha, bıyl egin egýge jáne ony jınaýǵa 220 mıllıard teńge bólindi. Bul qarajat byltyrǵa qaraǵanda 2 ese kóp. Fermerler 27 myń tonna arzan dızel otynyn aldy.

«Jyl basynan agroónerkásip kesheni boıynsha 180 ınvestıtsııalyq joba iske qosyldy. Olardyń quny - 132 mlrd teńge. Jyl sońyna deıin jobalar sanyn 237-ge jetkizemiz», - dedi Roman Sklıar.