Bıyl agroónerkásip kesheninde 291 ınvestıtsııalyq joba iske asady

ASTANA. QazAqparat – Aýyl sharýashylyǵy mınıstri mindetin atqarýshy Erbol Qarashókeev azyq-túlik qaýipsizdigi máselesi keshendi sheshýdiń joldaryn atady, dep habarlaıdy QazAqparat tilshisi.

«Azyq-túlik qaýipsizdigi máselesi keshendi túrde sheshiledi. Bıyl jyl sońyna deıin 536 mlrd teńge somasyna agroónerkásiptik keshendi damytý boıynsha 291 ınvestıtsııalyq joba iske asyrylady. Jalpy, 2023-2026 jyldary 2,6 trln teńgege 700 ınvestıtsııalyq jobany iske asyrý josparlanyp otyr», - dedi Erbol Qarashókeev Úkimet otyrysynda baıandama jasaı otyryp.

Onyń aıtýynsha, agroónerkásip kesheni sýbektileri úshin kredıt 2,5 paıyzben 10 jylǵa deıin beriledi.

«Sút, qus eti, kókónis ımportyn almastyratyn iri ónerkásiptik ınvestıtsııa jobalaryn ilgeriletý maqsatynda SQO tájirıbesi basqa óńirlerge engiziledi. Ol boıynsha óńir ákimdikteri 10 jyl merzimge agroónerkásip kesheni sýbektilerine jeńildetilgen qaıtarymdy kredıt (0,01% mólsherleme) bólýdi kózdeıdi. Bıyl osy maqsatqa 100 mlrd teńge bólindi. Sonyń esebinen shamamen 65 taýarlyq sút fermalarynyń qurylysy qarjylandyrylady. Bul sút óndirý kólemin keminde 373 myń tonnaǵa arttyrýǵa múmkindik beredi», - deıdi ol.

E. Qarashókeev málimdegendeı, joǵaryda atalǵan qadamdar bir jaǵynan aýylda jyl boıy jumyspen qamtýdy qamtamasyz etse, ekinshi jaǵynan ımportqa táýeldilikten arylýǵa múmkindik beredi.