Bıyl adam saýdasyna kómektesip, qylmyskerlermen sybaılasqan 2 polıtseı ǵana jazalandy

ASTANA. QazAqparat – Іshki ister mınıstriniń orynbasary Erjan Sadenov adam saýdasyna qatysy bar polıtsııa ókilderiniń statıstıkasyn atady, dep habarlaıdy QazAqparat.

«Eńbekti qanaý men jynystyq quldyqtyń artynda uıymdasqan qylmystyq toptar ǵana emes, quqyq qorǵaý organdary da tur. Ol aqparat kóbimizge málim, áleýmettik jelide de bar. Basqasha aıtsaq, ýchaskelik polıtseıler, ishki ister salasynyń ózge de qurylymdyq bólimsheleri eńbek jáne jynystyq quldyqqa kóz jumyp qana qoımaı, sybaılasyp otyr. Neshe qyzmetker osnydaı qylmysy úshin ustalyp, qandaı jaýapkershilikkke tartyldy?», - dep surady depýtat Baqytjan Bazarbek.

Vıtse-mınıstrdiń aıtýynsha, jyl basynan beri mundaı qylmysqa qatysy bar úsh qyzmetker áshkere bolǵan.

«Ókinishke qaraı, osyndaı 3 fakt boldy. Eki qyzmetker qylmystyq jaýapkershilikke tartyldy. Ýchaskelik ınspektor sanatyndaǵy eki ýchaskelik polıtsııa ókili týraly aıtyp otyrmyn. Onyń sebebin taǵy qaıtalap aıtqym keledi - 2018 jyly uıymdasqan qylmyspen kúres jónindegi basqarma qysqartylǵna bolatyn. Byltyr jyl aıaǵyna qaraı osy qurylymdy qalpyna keltirdik. Qazir osy qurylymnyń fýnktsıonaldyq mindetine adam saýdasymen kúres te kirip otyr. Árıne, bul jerde aýmaqtyq bólimshelerdiń de mindeti bar. Tek oblystyq departament bastyǵynyń ǵana emes, aýdandyq bólimniń de, basqarma basshylarynyń da mindeti. Jeke quramnyń zań men tártipti saqtaýyna árbir qurylym basshysy jaýapty», - dedi Erjan Sadenov.