Bıyl Abaı oblysynda 13 myńnan astam jańa jumys orny ashylady

SEMEI. QazAqparat - Búgin Abaı oblysynyń ákimi Nurlan Uranhaev Memleket basshysy Qasym-Jomart Toqaevtyń Úkimettiń keńeıtilgen otyrysynda bergen tapsyrmalaryn basqarma basshylarymen, máslıhat depýtattarymen jáne kásipkerlermen pysyqtap, aldaǵy jumystardy aıqyndady, dep habarlaıdy QazAqparat.

– Prezıdent tapsyrmasy - kúrdeli geosaıası syn-qaterler toǵysynda damýdyń jańa kezeńine baǵyt beretin evolıýtsııalyq jańǵyrý tujyrymdamasy, al Úkimet pen ákimdikter úshin, strategııalyq baǵdar ekeni anyq, – dep atap ótti oblys ákimi Nurlan Uranhaev.

Sonymen qatar, jıynǵa qatysýshylar halyqty jumyspen qamtý máselesin talqylady.

Jumyssyz azamattardyń tabysyn arttyrýdy qarastyratyn quraldardyń biri kásipkerlikti damytýdyń 2025 jylǵa deıingi jumyspen qamtýǵa járdemdesý sharalary pysyqtaldy.

Bıyl Abaı oblysynda 13 477 jańa jumys ornyn qurý josparlanǵan.

Onyń ishinde sýbsıdııalanatyndar – 3 122, ınfraqurylymdyq joba – 4015, jeke kásipkerlik baǵytydaǵy jumys – 6340. Birinshi jartyjyldyqta 5 425 jumys orny quryldy.

Sondaı- aq Jarma aýdanynda «Tsement zaýytyn qalpyna keltirý» jobasyn iske asyrý esebinen ǵana 1085 jumys orny qurylady.

- Alda ekonomıkanyń barlyq salalarynyń básekege qabileti men ınnovatsııalyq quramdasyn arttyrý jóninde aýqymdy jumys tur. Búkil memlekettik organdardyń, qarjy jáne qoǵamdyq ınstıtýttardyń is-qımylyn úılestirý - jumys tıimdiliginiń kepili. Sondyqtan Prezıdenttiń tapsyrmalaryn iske asyrýǵa árkim óz ýchaskesinde tikeleı jáne belsendi qatysýy tıis, - dep atap ótti Nurlan Uranhaev.