Bıyl 87 jańartylatyn energetıka nysany jumys isteıtin bolady
NUR-SULTAN. QazAqparat - 2019 jyldyń qorytyndysynda elimizde qýaty 1042 MVtty quraıtyn 87 jańartylatyn energetıka nysany jumys isteıtin bolady. Bul týraly búgin Úkimet otyrysynda QR Energetıka mınıstri Qanat Bozymbaev aıtty, dep habarlaıdy QazAqparat tilshisi.
«Qazirgi ýaqytta jańartylatyn energetıkany damytýǵa aıtarlyqtaı ınvestıtsııalar quıylýda. Buǵan Qazaqstandaǵy jańartylatyn energııa kózderiniń mol áleýeti sebep bolyp otyr. Sonymen qatar, zańnamalyq baza men qabyldanǵan nysanaly ındıkatorlar jaǵdaı jasaýda. Máselen, memlekettik josparlaý júıesi qujattarynda jańartylatyn energetıka úlesin 2020 jylǵa qaraı 3, 2025, al 2030 jylǵa qaraı 10 paıyzǵa deıin jetkizý maqsaty qoıylǵan. Sondaı-aq, 2050 jylǵa qaraı jalpy energııa tutynýdyń kem degende jartysy jańartylatyn jáne balamaly energııa kózderiniń úlesinde bolýy tıis», - dedi Q.Bozymbaev.
Osy oraıda mınıstr Qazaqstanda osy salany damytýǵa nıetti ınvestorlarǵa aıtarlyqtaı jaǵdaı jasalyp otyrǵanyn aıtty. «Jańartylatyn energııa kózderin paıdalanýdy qoldaý týraly» Zańda ınvestorlarǵa elektr energııany satyp alýǵa 15 jyldyq kelisimshart usynylatyndyǵyn, sonymen qatar birqatar preferentsııalar beriletindigin eske saldy.
«Tirkelgen tarıfter júıesi damýdyń bastapqy kezeńinde «jasyl» energııa naryǵyn tez iske qosýǵa múmkindik berdi. Mysaly, 2014 jyly belgilengen qýaty 178 MVt-tyq 26 nysan bolsa, 2019 jyldyń qorytyndysy boıynsha elimizde qýaty 1042 MVtty quraıtyn 87 nysan jumys isteıtin bolady. Jyl basynan beri 1,65 mlrd.kVt/saǵ energııa óndirildi. Bul 2018 jyldyń osy kezeńimen salystyrǵanda 65 paıyzǵa joǵary. Jyl sońyna deıin josparly kórsetkish 2,4 mlrd.kVt/saǵ oryndalatyn bolady«, - dedi ol.
Onyń dereginshe, qýattardy ulǵaıtýǵa qatysty josparly jumystyń arqasynda 2020 jyldyń qorytyndysy boıynsha júıede qýaty 1610 MVtty quraıtyn 108 nysan jumys isteıtin bolady. Al, 2024 jyldyń sońyna qaraı energojúıede keminde 3000 MVt jańartylatyn energııa qýaty bolady dep josparlanýda.
