Bıyl 836 aýyl ákimi úshin halyq tikeleı daýys beredi - Lázzát Súleımen
NUR-SULTAN. QazAqparat – Senator Lázzát Súleımen aýyl ákimderin saılaýǵa qatysty túsinik berdi, dep habarlaıdy QazAqparat tilshisi.
Saılaý týraly zań jobasy aıasynda 4 Zańǵa túzetýler engizý kózdelip otyr. Olar «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Saıası partııalar týraly», «Áskerı qyzmet jáne áskerı qyzmetshilerdiń mártebesi týraly» «Qazaqstan Respýblıkasynyń memlekettik qyzmeti týraly» zańdary.
«Zań jobasynyń negizi ózgeristerine toqtalatyn bolsam, aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderin saılanbalylyǵyn engizý. Ekinshiden, saıası partııalardyń Májilis pen máslıhattar saılaýy kezinde depýtattyq mandatqa ıe bolýy úshin alýy tıis saılaýshylardyń 7 paıyz daýsyn 5 paıyzǵa deıin tómendetý eskerilgen. Úshinshiden, saılaý bıýlletenderine «Bárine qarsymyn» degen baǵandy engizý qamtylǵan. Usynylyp otyrǵan kontseptýaldy ózgerister sarapshylar, saıasattanýshylar, saılaýshylar, halyqaralyq uıymdardyń biraz ýaqyttan bergi turaqty pikiri. Bul túzetýler elimizde jergilikti ózin-ózi basqarý ınstıtýtyn nyǵaıtýdyń kelesi kezeńin qamtamasyz etý úshin jasalyp otyrǵan naqty qadam», - dedi Lázzát Súleımen Senattyń jalpy otyrysynda.
Osy oraıda ol Orta Azııa memleketteri arasynda elimiz birinshi bolyp jergilikti ákimder saılanbalylyǵyn engizip otyrǵanyn atap ótti.
«Naqty aıtsaq, 2 myń 345 ákimshilik-aýmaqtyq birlik ákiminiń saılanbalylyǵy engizilýde. Bul laýazymdarǵa 2021-2025 jyldar aralyǵynda is basyndaǵy aýyl ákimderiniń ókilettik merzimderiniń aıaqtalýyna oraı, kezeń-kezeńmen ótkiziledi. Bıyldyń ekinshi jartyjyldyǵynda 836 aýyl ákimi úshin halyq tikeleı daýys beretin bolady», - dedi depýtat.
Aýyl ákimdigine úmitkerdi:
– saıası partııalar ár okrýgte 1 úmitkerden;
– azamattar ózin-ózi usynady (ózin-ózi usynǵan úmitker okrýgtegi saılaýshylardyń keminde 1%–qoldaryn jınaýy tıis);
«Úmitkerdi usyna alatyn úshinshi sýbekt - ol aýdan ákimi.
Eger usyný merziminiń sońyna deıin bir ǵana kandıdat qalsa (bizde balamasyz saılaý ótkizilmeıdi), aýdan ákimi kandıdattar usyna alady. Bul kandıdattardy ákim jergilikti qaýymdastyqpen kelisýi kerek. Qazirgi tájirıbede keıbir aýdan ákimderi jergilikti qoǵamdastyq dep az ǵana azamattarmen kezdesedi degen pikir bar. Tikeleı saılaýda buǵan jol berilmeý kerek dep esepteımin. Jergilikti qoǵamdastyq ókilderimen tolyqqandy kelisim bolýy kerek. Saılaýdyń barlyq kezeńderi ashyq, jarııaly ótýi, baıqaýshylardyń qatysýy da zańǵa engizilip otyr. Saılaý júıesi – majorıtarlyq. ıAǵnı, daýys berýge qatysqan saılaýshylar daýsynyń basqa kandıdattarǵa qaraǵanda kópshilik daýys alǵan azamat aýyl ákim bolyp saılanady jáne aýmaqtyq saılaý komıssııasy ony tirkegennen keıin birden qyzmetine kirisedi», - dep túsindirdi senator.
Eske sala keteıik, búgin Senat ákimderdi tikeleı halyqtyń saılaýyna múmkindik beretin zańdy qabyldady.
