Bıyl 730 myń sharshy metr turǵyn úı tapsyrylady - OQO

ShYMKENT. QazAqparat - Ońtústik Qazaqstan oblysynda byltyr «Nurly jer» baǵdarlamasy aıasynda 721,1 myń sharshy metr turǵyn úı tapsyryldy. Bul 2016 jylmen salystyrǵanda 36,2 paıyzǵa ósip otyrǵandyǵyn kórsetedi, dep habarlaıdy OQO ákiminiń basapsóz qyzmeti.

  Tapsyrylǵan úılerdiń 436,2 myń sharshy metri - kópqabatty, 284,9 myń sharshy metri - jeke turǵyn úı. Aǵymdaǵy jyly 730 myń sharshy metr turǵyn úıdi paıdalanýǵa berý josparlanyp otyr. Bul týraly OQO óńirlik kommýnıkatsııalar qyzmetinde ótken brıfıngte oblystyq qurylys basqarmasynyń basshysy Quttybek Jamashev málim etti.

Basqarma basshysynyń aıtýynsha, ótken jyly 233 ınvestıtsııalyq joba iske asyrylǵan. Olardyń qurylysyna QR Ulttyq qory, respýblıkalyq jáne oblystyq bıýdjet qarajattary esebinen 66,4 mlrd. teńge qaralǵan bolatyn. Bul kórsetkish 2016 jylmen salystyrǵanda 32 paıyzǵa artyp otyr.

«Bıyl oblys aýmaǵynda jalpy respýblıkalyq jáne oblystyq bıýdjetten baǵyttalǵan 52,5 mlrd teńgege jalpy 186 ınvestıtsııalyq jobanyń qurylysyn iske asyrý josparda. Sondaı-aq, ótken jyly jospardaǵy 233 nysannyń 115-i paıdalanýǵa berildi. Qalǵan 118 nysan 2018 jylǵa ótpeli. Ulttyq qordan «Nurly jol» memlekettik baǵdarlamasy aıasynda 35 bilim berý nysanynyń qurylysy júrgizilip, jyl qorytyndysymen 20 mektep paıdalanýǵa tapsyryldy. Qalǵan 15 mektep 2018 jylǵa ótpeli», - dedi Quttybek Rahmatýllauly.

Budan ózge, ótken jyly oblysta memlekettik bıýdjet qarajaty esebinen turǵyn úı qurylysyn aýdandarda júrgizý úshin ınjenerlik kommýnıkatsııalarǵa jalpy somasy 8,9 mlrd  teńgege 21 nysannyń qurylysy júrgizildi. Jyl qorytyndysymen 8 nysan paıdalanýǵa tapsyrylǵan.