Bıyl 700-den astam qandas soltústik óńirlerge qonys aýdarýǵa ótinish bildirgen

ASTANA. QazAqparat – Soltústik óńirlerge qonys aýdaratyn qandastarǵa turǵyn úı sertıfakaty beriledi. Premer-Mınıstr Álıhan Smaıylovtyń Májilis depýtattarynyń saýalyna bergen jaýabynda osyndaı málimet aıtyldy, dep habarlaıdy QazAqparat.

«Etnıkalyq kóshi-qondy retteý baǵytyndaǵy ádister qaıta qaraldy. Halyqaralyq tájirıbege súıene otyryp, shetelde turatyn etnıkalyq qazaqtardyń qandas mártebesin alýǵa ótinishin Syrtqy ister mınıstrliginiń sheteldegi mekemesi arqyly «bir tereze» qaǵıdaty boıynsha qabyldaý mehanızmi engizildi. Jańa mehanızm pılottyq rejımde birqatar elde iske asyrylýda. Etnıkalyq qazaqtar elge kelgenge deıin ózderi keletin óńirler boıynsha, jumys oryndary, bos jer ýchaskeleri, áleýmettik-ınfraqurylymmen qamtylǵandyǵy týraly konsýltatsııa alady», - dep jazady Úkimet basshysy.

Álıhan Smaıylovtyń sózinshe, 700-den astam qandastan Qazaqstannyń soltústigine kóshý týraly ótinish túsken.

«Qazirgi tańda soltústik óńirlerge kóshý úshin 771 (237 otbasy) etnıkalyq qazaqtan ótinish qabyldandy. Onyń 368-i (111 otbasy) ruqsat aldy. Bıyldan bastap olarǵa turǵyn úı alý úshin ekonomıkalyq utqyrlyq sertıfıkaty qosymsha usynylady (satyp alý, salý, alǵashqy jarna alý). Sertıfıkat qonys aýdarýshynyń/qandastyń ózine beriledi. Bul azamattarǵa óz betinshe soltústik óńirlerde turǵyn úı tańdaýyna múmkindik beredi», - delingen jaýapta.

Premer-Mınıstr usynǵan anyqtama dereginde atalmysh sertıfıkatqa bıyl bıýdjetten 10,1 mlrd teńge bólingeni aıtylǵan. Ol aqshanyń zańdy jolmen taratylýyn Joǵary aýdıtorlyq palata qadaǵalaıdy.