Bıyl 70-ten astam elordalyq túlek «Altyn belgi» úzdik attestatyn qorǵap shyqty
ASTANA. 14 maýsym. QazAqparat - 2012-2013 oqý jylynyń Ulttyq biryńǵaı testileýiniń aldyn ala jasalǵan qorytyndysy boıynsha «Altyn belgi» úzdik attestatyn 71 túlek qorǵap shyqty, dep habarlaıdy elorda ákimdiginiń baspasóz qyzmetinen.
«Bıylǵy jyly qala boıynsha ortasha ball - 81,3 boldy. Salystyrsaq, 2012 jyly bul kórsetkish 78,5 balǵa teń bolǵan edi. Eki oqýshy: №46 mektep-lıtseı oqýshysy Aleksandr Shalagaeva men №54 mektep-lıtseı oqýshysy Laýra Jaýhanova 123 ball jınady. 100-den 122 balǵa deıin 629 oqýshy jınady. Qajetti ótý balyn 167 túlek eńsere almady. Nemese ol 5,4%»,- dep málimdeıdi qala ákimdiginen.
UBT-ǵa barlyǵy 3637 túlektiń 3073-i qatysty. Bul barlyq túlekter sanynyń 84,5%-y. Memlekettik emtıhan túrindegi dástúrli qorytyndy attestattaýdan ótkender sany- 564 nemese 15,5%. Onyń ishinde 218 qatysýshy halyqaralyq olımpıadalar men ǵylymı jobalar baıqaýynyń jeńimpazdary, sondaı-aq, alys-jaqyn shetelderde bilim alý oryndaryna oqýǵa tapsyratyndar. Astananyń resmı saıtynyń jazýynsha, elorda mektepteriniń ishinde eń joǵary kórsetkish kórsetken №9 «Zerde» daryndy balalarǵa arnalǵan mektep túlekteri. Atalǵan mektep túlekteriniń ortasha baly - 116,09.
